افغانستان آزاد لیک جبهه سی، طالبان حکومتی نینگ قوراللی مخالف گروهلریدن بیری، بدخشان ولایتیده اۉتکزگن بیر هجوم عاقبتیده طالبان نینگ بیر قوماندانی داخل بېش اعضاسینی اۉلدیرگنینی ادعا قیلدی. اوشبو جبهه چهارشنبه کونی، ۱۶ میزان، نشر قیلگن بیر بیانیه‌سیده، بو واقعه نینگ سه‌شنبه کونی کېچقورون یوز بېرگنینی بیلدیرگن.
جبهه نینگ بیانیه‌سیگه کۉره، هجوم اوشبو ولایت نینگ کران و منجان تومنیده طالبان اعضالرینی آلیب کېته‌یاتگن بیر موترگه قرشی اویوشتیریلگن. بیانیه ده شونده‌ی دېییلگن: "بو عملیاتده، قاری … اسملی بیر طالبان قوماندانی تۉرت نفر قۉریقچیسی بیلن بیرگه اۉلدیریلدی."
آزاد لیک جبهه‌سی شونینگدېک، اوشبو موتر کران و منجان تومنیدن پنجشېر ولایتی تامان حرکت قیلیاتگن پیتده نشانگه آلینگنینی قۉشیمچه قیلدی. بو گروه کۉپینچه افغانستان نینگ شمالی منطقه لریده طالبان کوچلریگه قرشی هجوملر مسئولیتینی اۉز بوینیگه آله دی.
طالبان حکومتی حاضرگچه آزاد لیک جبهه‌سی نینگ بو ادعاسی حقیده هیچ قنده ی فکر بیلدیرمه گن. عادتاً، طالبان مقام لری قوراللی مخالف گروهلر هجومی نتیجه سیده اۉز کوچلری نینگ تلفاتلری حقیده سکوت اختیار قیله دیلر و بو کبی ادعالرنی مستقل منبعلر آرقه لی تصدیقلش یا رد اېتیش قیین دیر.
بیانیه نینگ باشقه بیر قسمیده، آزاد لیک جبهه‌سی طالبان نینگ اۉз کنترولی آستیده گی منطقه‌لرده محلی اهالینی مخالف جبهه لرگه قرشی تبلیغات قیلیشگه مجبورلشتیریاتگنینی ادعا قیلگن.
۲۰۲۱ نچی ییل نینگ اگست آییده طالبان نینگ تکرار قدرت گه اېریشگنیدن بېری، ملی مقاومت جبهه‌سی و افغانستان آزاد لیک جبهه‌سی کبی تورلی ناملر آستیده بیر نېچه قوراللی گروه میدانگه چیققن. اولر وقت زمانی بیلن تورلی ولایتلرده، خصوصاً مملکت نینگ شمالیده، توقنشوولر و هجوملر خبرینی بېریب توره‌دیلر.
منبع: افغانستان آزاد لیک جبهه سی نینگ بیانیه‌سی
🌐
