مارک زاکربرگ و اونینگ عیالی پریسیلا چان تامانیدن تأسیس اېتیلگن بایوهاب تحقیق تشکیلاتی، گوگل و متا شرکتلری همده امریکا قوشمه ایالتلری حکومتی بیلن انسان حجره لری نینگ هوش مصنوعی مدللرینی ایجاد قیلیش اوچون ۱.۸ میلیارد دالرلیک کته بیر لایحه ده همکارلیک قیلیشینی اعلان قیلدی.
"مجازی بیالوژی تشبثی" دیب ناملنگن اوشبو لایحه چهارشنبه کونی اعلان قیلینیب، گوگل دیپ مایند و متا کبی تکنالوژی دنیاسی نینگ بویوک شرکتلرینی همده امریکا قوشمه ایالتلری نینگ انرژی اداره سی و ملی ساغلیک انستیتوتی نی بیرلشتیره دی. بو لایحه نینگ اساسی مقصدی، هوش مصنوعی نینگ پیشبینلیک قیلووچی مدللرینی اۉرگتیش اوچون کینگ کولملی بیولوژیک معلوماتلرنی تولید و استانداردلشتیریش دیر.
اعلامیه گه کۉره، گوگل و متا بیرگه لیکده بو لایحه گه ۳۰۰ میلیون دالر سرمایه یاتقیزه دیلر. امریکا انرژی اداره سی ۵۰۰ میلیون دالردن آرتیق و ملی ساغلیک انستیتوتی هم آلدینگی فدرال سرمایه گذاری لردن ۵۰۰ میلیون دالردن کۉپراق ارزش گه اېگه معلومات و منبعلرنی فراهم قیله دی. بایوهاب نینگ اۉزی هم اپریل آییده ۵۰۰ میلیون دالرلیک بیر تعهد بیلن بو تشبثنی باشله گن اېدی.
اوشبو کته همکارلیک نینگ نهایی مقصدی، بیر "مجازی حجره" قوریش دیر. بو هوش مصنوعی مدللری حجره لرنینگ رفتاری و دورا یا-ده ژنتیکی اۉزگریشلر کبی مداخله لرگه قنده ی جواب بېریشینی آلدیندن ایتیب بېره آله دی. بو ایش عالملرگه فزیکی آزمایشلردن آلدین، احتماللردن دیجیتال شکلده فایده لنیش امکانیتینی بېریب، علمی کشفیاتلر سرعتی نی جدی روشده تیزلشتیره دی.
بایوهاب، اوشبو لایحه دن حاصل بۉلگن معلوماتلر توپلمی نینگ نهایت کینگ علمی جمعیت گه تقدیم اېتیلیشینی بیلدیردی، گرچه تجاری شریکلر تمویل قیلیشگه یاردم بېرگن معلوماتلرگه بیر ییل مدت گه منحصر ایریشیش حقوقیگه اېگه بۉله دیلر.
منبع: بایوهاب اعلامیه سی
🌐
