تخار ولایتیده طالبان حکومتی نینگ زراعت، سوغاریش و چارواچیلیک ریاستی معلوم قیلیشیچه، بو ولایتده شالی حاصلاتی اوتگن ییل گه قره گنده اون فایز گه آشگن. بو ریاست شنبه کونی، ۱۹ میزان ده، بیر ویدیو ترقه تیب ایتگن که بو آرتيش سوو باشقرووی نینگ یخشی لنگنی و محلی دهقانلردن حمایت ایتیلیشی نینگ نتیجه سی دیر.
بو خبر شونده ی بیر حالده ترقه لگن که سونگگی ییللرده تخار و باشقه شمالی ولایتلر نینگ دهقانلری پی در پی قورغاقچیلیک و سوو ییتیب سیزلیگی سببلی جدی قیینچیلیکلر بیلن روپره بولگن اېدیلر. رسانه لر نینگ گزارشی گه کوره، بعضی حدودلرده سوو کم چیلیگی حتی شالی اېکیش نینگ یریم گه توشیشی گه و بعضی اېکین یېرلری نینگ قاقره یېرگه ایلنیشی گه سبب بولگن اېدی.
تخارده شالی حاصلاتی نینگ آشیشی بو ولایت نینگ محلی اقتصادی و ییمک خوفسیزلیگی اوچون یخشی بیر خبر بولیشی ممکن. شالی تخارده اساس زراعتی محصوللردن بیری حسابلنه دی و مینگلب عایله نینگ تیریکچیلیگی اونینگ اېکیش و ییغیب آلیش گه باغلیق دیر.
محلی مسووللر امید بیلدیرگنلر که حمایوی برنامه لر نینگ دوامی و سوو منبعلری وضعیتی نینگ یخشی لنیشی بیلن، بو ولایتده زراعتی محصوللر کېله جک ییللرده هم کوپه یه دی. اولر تاکیدله گنلر که ینги سوغاریش کاناللری قوریش و اېسکی کاناللری نی ترمیم قیلیش آرقه لی دهقانلر اوچون سوو کم چیلیگی معما سی نی دایمی صورتده حل قیلیش گه حرکت قیله دیلر.
شونده ی بولسه ده، اقلیم اوزگریشلری و دوره یی قورغاقچیلیک کبی عمومی قیینچیلیکلر افغانستان نینگ زراعت سکتوری اوچون جدی بیر تهدید صفتیده باقی قاله دی. ایش بیلرمانلر نینگ ایشانچی گه کوره، بو قیینچیلیکلر بیلن کوره شیش اوچون، سوو منبعلری نی باشقریش و قورغاقچیلیککه مقاوم مدرن زراعتی أصوللرنی رواجلنتیریش بوییچه کتته سرمایه گذارلیکلرگه ضرورت بار.
تخارده بو حاصلات نینگ آشیشی بیر حالده یوز بیرگن که افغانستان عموماً ییمک بحرانی بیلن دوچ کېلگن و میلیونلب کیشی بشردوستانه یاردم لرگه محتاج. ایچکی محصوللرنی یخشی لش مملکت نینگ واردات گه باغلیق لیگی نی کمه یتیریش و ملی اقتصادنی کوچه‌یتیریشگه یاردم بېریشی ممکن.
منبع: تخار زراعت ریاستی
🌐
