طالبان کنترولی آستیده گی افغان قیزیل آی جمعیتی نینگ رئیسی و دوحه ده بو گروه نینگ مذاکره چی هیئتی نینگ بویوک اعضالریدن بیری بولگن شهاب الدین دلاور، امریکا قوشمه ایالتلری بیلن صلح کیلیشوونامه سیده خاتین قیزلر موضوع سی ذکر اېتیلمه گنینی بیلدیردی.
دلاور، شمشاد تلویزیونی بیلن بیر مصاحبه ده، دوحه کیلیشوونامه سی نینگ بوتون متنی ایچیده، باشیدن آخریگچه، حتی بیر مرته هم «خاتین قیز» سوزی ایشلتیلمه گنینی ایتدی. او بو موضوع نی فرهنگی حساسیت لر بیلن باغلیق دیب بیلیب و قۉشیمچه قیلدی: «پشتون لر و افغان لر خاتین قیزلر مسئله سیده شونچه لیک سخت گیر دیرلر که ییغین لرده خاتین قیز نینگ آتی نی آلمیدیلر؛ بیز قنده‌ی قیلیب بو موضوع نی امریکالیک لر بیلن مطرح قیله آله آردیک؟»
بو طالبان مسؤلی، بو صحبت نینگ باشقه بیر قسمیده، آلتینچی صنفدن یوقاری قیزلرنینگ اۉقیشی منъ اېتیلگنینی حمایه قیلدی. او، بو ممنوعیت نینگ طالبان رهبری هبت الله آخوندزاده نینگ فرمانی اساسیده صادر اېتیلگنینی و «امر ثانی» یعنی کیینگی دستورگچه اۉز کوچی نی سقلب قالیشینی تاکیدله دی.
دلاور نینگ بو ینگی بیاناتی اونینگ آلدینگی موضع لری بیلن بوتونله‌ی قرشی دیر. دوحه مذاکره لری جریانیده، او بیر ییغینده خاتین قیزلرنینگ دکترا سویه سیگچه تحصیل آلیش و ایشلش حقی گه اېگه ایکنینی و طالبان نینگ بو حق لرگه متعهد بولیشینی ایتگن اېدی. بو موضع نینگ اۉزگریشی، او پیتده طالبان وعده لری نینگ صداقتی حقیده سوال لر یره ته دی.
تقریباً اوچ ییل آلدین هم، دلاور بیر نیچه صحبتده قیزلر اوچون اۉقیش محدودیتلری نینگ آلیب تشلنیشی ممکن لیگی حقیده امید بیلدیرگن اېدی، لیکن بو امیدلر هیچ قچان حقیقت گه ایلنمه دی.
بو وضعیتده، افغانستان خلقی نینگ بویوک اکثریتی، انسان حقلری تشکیلاتلری و خلق ارا جامعه، طالبان تامانیدن خاتین قیزلرگه قرشی قۉیلگن محدودیت لرگه شدت بیلن مخالف دیر. کۉپچیلیک بو ممنوعیت لرنی افغان لر نینگ فرهنگی ایمس، بلکیم طالبان نینگ افراطی ایدیالوژی سیدن کېلیب چیققن دیب بیله دی.
دلاور نینگ سونگگی بیاناتی، خاتین قیزلرگه قرشی حاضرگی محدودیت لرنینگ طالبان حکومتی نینگ اساسی و دواملی سیاستی ایکنینی و یقین کېله جکده اونینگ اۉزگریشی اوچون انیق بیر دورنما یوقلیگی تشویشینی کوچه یتره دی.
منبع: شمشاد تلویزیون
🌐
