افغانستان نینگ اېنگ کۉپ تماشا قیلینه دیگن خصوصی تلویزیونلریدن بیری بۉلگن طلوع تلویزیونی، اۉز فعالیتینی باشله گنی نینگ ییگیرمه ایککینچی ییللیگینی اۉتکزدی. اوشبو شبکه ۱۳۸۳- ییل میزان آیی ده «موبی گروپ» تامانیدن قوریلگن بۉلیب، اۉتگن ایککی اون ییللیکده مملکت نینگ رسانه فضاسی، عامه مدنیتی و خبرچیلیک ساحه سیده مهم رول اۉینه گن.
۱۴۰۰- ییلگی سیاسی اۉزگریش لردن آلدین، طلوع تلویزیونی «افغان ستاره سی» کبی استعداد قیریش دستوری، تلویزیونی سریال لر و قیزغین سیاسی بحث لر کبی ینگی لیکچی دستور لرنی تقدیم اېتیش بیلن افغانستان نینگ رسانه چهره سینی اۉزگرتیردی. «طلوع نیوز» نینگ ۲۴ ساعت لیک خبر شبکه‌سی صفتیده قوریلیشی هم تیز خبر ییتکیزیش ساحه سیده بویوک بیر قدم اېدی.
لېکن، ۱۴۰۰- ییل نینگ اسد آیی ده طالبان حکومتی نینگ ایش باشیگه کېلیشی بیلن، طلوع هم باشقه رسانه لر سینگری کۉریلمه گن قیین چیلیک لرگه دوچ کیلدی. کۉپ سانلی تجربه لی ژورنالیست و ایشلاوچی نینگ مملکتنی ترک اېتیشی، موسیقی و کۉنگیل آچر دستور لرنینگ توخته تیلیشی و محتوا بوییچه جدی چېکلاو لرنینگ قۉللنیشی، اوشبو شبکه نی فعالیت نینگ ینگی بیر باسقیچیگه آلیب کیردی.
خبر منبعلری نینگ معلوماتیگه کۉره، بو جریانده بیان اېرکینلیگی و رسانه لر فعالیتیگه چېکلاو لر آشگن. طالبان حکومتی رسانه لر اوچون ینگی یۉل-یۉریغ لرنی عملگه قۉیگن که اولر آره سیده خاتین-قیز باشقرووچی لرنینگ یوزینی یاپیشی، بعضی سریال لر نینگ نشر اېتیلیشی نینگ منع قیلینیشی و تنقیدی خبر لرنینگ یاریتیلیشیگه چېکلاو لر اورین آلگن.
بوندن تشقری، خوفسیزلیککه عاید قیین چیلیک لر هر دایم بو رسانه نینگ ایشلاوچی لری اوچون جدی بیر تشویش بۉلیب کیلگن. اېنگ قانلی واقعه لردن بیری، ۱۳۹۴- ییل جدی آیی ده (۲۰۱۶- ییل جنوری) کابلده موبی گروپ ایشلاوچی لری نینگ موتریگه اویوشتیریلگن انتحاری هجوم اېدی که اونینگ نتیجه سیده ییتتی نفر ایشلاوچی هلاک بۉلدی.
بارچه بو قیین چیلیک لر و بعضی دستور لرده کیفیت نینگ پسه ییشیگه قره مسدن، طلوع تلویزیونی اۉز بقا سی اوچون حرکت قیلیب تورگن. اوشبو شبکه، مکتبدن محروم قالگن قیز لر اوچون تعلیم-تربیه دستور لرینی ایشلب چیقاریش و اۉز ساختارینی ینگی شرایط گه ماسلشتیریش آرقه لی افغانستان نینگ رسانه فضاسیده اۉز حضوری نی سقلشگه اورینماقده.
طلوع نینگ ییگیرمه ایککی ییللیک فعالیتی، حاضرگی افغانستانده بیان اېرکینلیگی و رسانه لر تاریخی نینگ فراز و نشیب لرینی عکس اېتتیره دی. آزاد رسانه لر نینگ رواجی بیلن باشلنگن بو یۉل، حاضرده قیین سیاسی و اقتصادی چېکلاو لر آره سیده دوام اېتماقده.
منبع: زرین تلویزیون
🌐
