امریکا قۉشمه ایالتلری نینگ تشقی ایشلر وزیری مارکو روبیو، یکشنبه کونی، ۱۸ اکتوبرده، اۉزبیکستان نینگ سمرقند شهریگه ییتیب کیلدی. بو سفر ایکّی تامانلمه مناسبت لرنی مستحکملش و امریکا-اۉزبیکستان سوداگرلیک و سرمایه گذارلیک کینگشی ییغیلیشیده قتنه شیش مقصدی بیلن عملگه آشیریلماقده.
اۉزبیکستان جمهور رئیسلیک اداره سی نینگ رئیسی سعیده میرضیایوا، اۉزی نینگ ایکس (سابق تویتر) صحیفه سیده جناب روبیو نینگ تشریفینی خوش قرشی آلدی. او اۉز پیامی ده اۉزبیکستان سوداگرلیک ییتکچی لری بیلن مذاکره قیلیش و بو مهم ییغیلیش نی اۉتکزیش گه تیار ایکنینی یازیب، بو سفرنی ایکّی مملکت آره سیده گی مذاکره و همکارلیک نی کوچه‌یتیریش اوچون بیر فرصت دېب آته دی.
گزارشلرگه اساساً، بو سفر نینگ اساسی محوری واشنگتن و تاشکینت آره سیده گی اقتصادی و سوداگرلیک همکارلیکلرینی کینگه‌یتیریش دن عبارت بولیب، سوداگرلیک و سرمایه گذارلیک کینگشی ییغیلیشیده، امریکالیک شرکتلر اوچون اۉزبیکستان بازاری ده ینги فرصتلر همده اۉزه را سرمایه گذارلیکلرنی آشیریش یوللری بحث و بررسی قیلینیشی کوتیله دی.
بو سفر، اۉزبیکستان جمهور رئیسی شوکت میرضیایف رهبرلیگی آستیده تشقی سرمایه نی جلب قیلیش و اۉز اقتصادینی مدرنیزه قیلیش اوچون کینگ قمره ولی اقتصادی اصلاحاتلرنی باشلگن بیر پَیتده یوز بېرماقده. امریکا قۉشمه ایالتلری بو اصلاحاتلرنی قۉللب قوتلب، اورته آسیا منطقه سیده فعالراق رول اۉینش گه حرکت قیلماقده.
اورته آسیا اۉز استراتیژیک موقعیتی و طبیعی منبعلری سببلی، دنیا کوچلری نینگ توجهینی بارغانسری اۉزیگه جلب قیلماقده. امریکا تشقی ایشلر وزیری نینگ منطقه گه سفری، بو حوزه نینگ واشنگتن تشقی سیاستی اوچون کونساین آرتېب باره یاتگن اهمیتینی کۉرسه ته دی.
اقتصادی مسئله لردن تشقری، منطقه وی و خوفسیزلیک موضوعلری، جمله دن افغانستان وضعیتی نینگ هم ایکّی تامانلمه اوچره شوولرده بحث قیلینیشی کوتیله دی. اۉزبیکستان افغانستانده ثبات اورنه تیش حرکتلریده مهم رول اۉینه ماقده.
منبع: سعیده میرضیایف نینگ ایکس صحیفه سی
🌐
