طالبان حکومتی نینگ تشقی ایشلر وزیری مولوی امیرخان متقی، بیرلشگن ملتلر تشکیلاتی نینگ افغانستان اوچون خاص نماینده سی و یوناما باشلیغی رباب فاطمه بیلن اوچره شیب، صحبت قیلدی. بو اوچره شوو ایکّی تامان آره سیده گی همکارلیکلرنی کینگه‌یتیریشگه متمرکز اېدی.
تشقی ایشلر وزیرلیگی نینگ اعلامیه سیگه اساساً، بو ییغیلیشده همکارلیکلرنی رواجلنتیریش، مملکت گه قَیتیب کیله یاتگن افغان مهاجرلرنینگ انسان پرورلیک احتیاجلریگه ییتیشیش، و یاردملرنی مؤثر تنظیم ایتیش کبی تورلی موضوعلر بحث قیلیندی. رواجلنیش لایحه لرینی قۉللب قوتلش هم بو صحبت نینگ باشقه بیر محوری اېدی.
بو اوچره شووده مطرح ایتیلگن باشقه بیر مهم موضوع، بیرلشگن ملتلر تشکیلاتی نینگ گزارلشریده افغانستان وضعیتی حقیده انیق معلوماتلردن فایده لنیش و وضعیتنی متوازن عکس ایتتیریشگه تأکید ایتیش اېدی. طالبان حکومتی آلدین هم کۉپ مرته بیرلشگن ملتلر و انسان حق لری نهادلری نینگ افغانستان وضعیتی حقیده گی بعضی گزارلشلریدن تنقید قیلگن اېدی.
خانم فاطمه و جناب متقی هر ایککله سی افغانستانده گی موجود قیینچیلیکلرنی حل قیلیش اوچون تعامل و همکارلیک دوامی نینگ اهمیتی گه تأکید ایتدیلر. یوناما، بیرلشگن ملتلر تشکیلاتی نینگ افغانستانده گی سیاسی ماموریتی صفتیده، خلق ارا یاردملرنی هماهنگ قیلیش و انسان حق لری وضعیتی نی نظارت قیلیشده مهم رول اۉینه یدی.
بو اوچره شوو، افغانستان نینگ چوچقور بیر انسان پرورلیک بحرانی بیلن روپه ره بۉلیب، میلیونلب کیشی نینگ عاجل یاردملرگه محتاج بۉلگن بیر پَیتده یوز بېرماقده. قۉنشی مملکتلردن، خصوصاً پاکستان و ایران دن مهاجرلرنینگ قَیتیب کېلیشی، چېک لنگن منبعلرگه بۉلگن باسیم نی آشیریب یوبارگن.
طالبان حکومتی مملکت نینگ اقتصادی قیینچیلیکلریگه ییتیشیش اوچون رواجلنیش لایحه لری اوچون خلق ارا قۉللب قوتلشنی قولگه کیریتیش گه حرکت قیلماقده، لیکن خلق ارا جمعیت حاضرگچه افغانستانده گی انسان حق لری وضعیتی، خصوصاً خاتین-قیزلرنینگ حق لری حقیده خواطرده دیر.
منبع: تشقی ایشلر وزیرلیگی
🌐
