ایران دن کېلگن تکانلی گزارش لر، افغان مهاجرلری و پناهلاوچیلری نینگ ایران چېگره کوچلری تامانیدن آشیب باره‌یاتگن خشونت و جدی یمان معامله گه دوچ کېله یاتگنینی کۉرسه ته دی. افغان رسانه لری تامانیدن نشر ایتیلگن بو گزارش لرده قتل، اوریش و سیستماتیک تحقیرلش نینگ دردلی حکایه لری شامل دیر.
بیر حکایه جمهوریت نینگ سقوطیدن سۉنگ ایش تاپیش اوچون ایرانگه بارماقچی بۉلگن ۱۶ یاشلی سهراب حقیده دیر. گزارشگه کۉره، او نیمروز یقینیده گی میلک چېگره سیده بیر ایرانلی چېگره‌چی تامانیدن آرقه دن آتیلیب اۉلدیریلگن. سهراب نینگ یقینلری، چېگره‌چی نینگ آتشگه رخصتی یۉقلیگینی ایته دیلر.
سهراب نینگ عایله سی نینگ فاجعه سی بو ییرده توگمه دی. اونینگ جسدینی آلیش اوچون، آنه سیدن ۵۰ میلیون تومان تۉلش یاکه جسدنی کسیش اوچون رضایت ورقه‌سینی امضالشی سۉره لگن. چاره سیز قالگن عایله ورقه‌نی امضاله‌گن. لېکن اولرگه تاپشیریلگن جسد، یقینلری نینگ ایتیشیچه، «تاماقدن قورساققچه کېسیلگن» و قۉرقینچلی طرزده تیکیلگن اېدی.
ایکّینچی حکایه «ح.ر» ناملی بیر افغان مهاجر فعال تیلیدن دیر که کابل سقوطیدن سۉنگ نیمروز چېگره سیده اۉز یورتداشلریگه یاردم بېریشگه بارگن. او اۉز کۉزلری بیلن ایرانلی چېگره چیلرنینگ افغان مهاجرلرینی، یاش و قری نی، «چوب و پایپلر بیلن اوریب، توختاوسیز حقارت قیلگنلرینی» کۉرگنینی ایته دی.
بو فعال، ایران حکومتی نینگ افغان مهاجرلریدن سیاسی باسیم واسطه سی صفتیده، خصوصاً هیرمند سووی مسئله سیده، فایده له نه یاتگنینی ادعا قیله دی. او تهران اطرافیده گی ورامین ده افغان ایشچیلری و طلبه لری نینگ، سندلری سۉرلمسدن، اوریش و توهین بیلن توتیلیب و انتقال ایتیلگنینی اَیتدی.
بو گزارش لر افغان مهاجرلرنینگ قۉشنی مملکتده چېکه‌یاتگن عذابلرنینگ کیچیک بیر بۉله گینی تصویرگه تارتماقده. بو واقعه لرنینگ کپچیلیکی باسیم و قۉرقینچ فضاسی سببیدن ایتیلمه‌یدی، اما ایران چېگره‌لری و شهرلریده بیر چوقور انسانی حقوقلر بحرانی نینگ موجودلیگینی کۉرسه ته دی.
منبع: افغان رسانه‌لری
🌐
