بریتانیا مدافعه وزیرلیگی سه‌شنبه کونی اعلان قیلدی که، شاهی هوا کوچلری (RAF) نینگ تایفون جنگی اوچاقلری حوثیلرنینگ هوا هجوملریدن سعودی عربستان شهرلری و مهم ملی زیربنا لرینی قۉریقلشگه یاردم بېریش اوچون مدافعه قیلووچی ماموریتلرنی اوچه دی.
بو وزیرلیک، اوچاقلرنینگ فقط مدافعه رولی بیلن ایشلشلری و ایرانگه متفق حوثیلرگه قرشی هجومی اوروشلر آلیب بارمسلیکلرینی انیقلشتیردی. بریتانیا نینگ ایتیشیچه، بو گروه نینگ هجوملری منطقه برقرارلیگینی تهدید قیلیب و انرژی تدارکاتی و تجارتی یۉللرنینگ بوزیلیشی خطره سینی همراه قیله دی.
بریتانیا مدافعه وزیری وس استریتینگ، بیر بیانیه ده شونده ی دېدی: «بیزنینگ متفقیمیز سعودی عربستانگه حوثیلرنینگ دواملی هجوملری کاملاً نفرتلی دیر. مخصوصاً ریاض هوا میدانی نی هدف آلیش، حوثیلرنینگ منطقه ده وضعیتنی کېسکینلشتیریش اوچون قنچه‌لیک اوزاققه باره یاتگنینی کۉرسته دی.»
او قۉشیمچه قیلدی: «شو سببلی بوگون من بریتانیا نینگ کۉپراق حربی حمایه سینی تصدیقلدیم. شاهی هوا کوچلری نینگ تایفونلری اوچووچیسیز اوچاقلر و راکتلرگه قرشی سعودی هوا حریمینی قۉریقلشگه یاردم بېریش اوچون مدافعه قیلووچی هوا ماموریتلرینی عملگه آشیره دی.»
بو قۉشیمچه حمایه، سعودی عربستان حکومتی نینگ بیر درخواستی آرتیدن عملگه آشیریله دی. بریتانیا باش وزیری اندی برنهام، شو آی نینگ باشیده بریتانیا نینگ بو درخواستنی تېکشیریشگه تیار ایکنینی ایتگندی. بریتانیا شونینگدیک بیر اطلس A400M ترانسپورت اوچاغی و حربی مصلحتچیلرنی هم یوباره دی که، بو سپتامبر آییده اعلان قیلینگن و RAF Voyager هوا-هوا یاقیلغی تۉلدیریش اوچاغینی اۉز ایچیگه آلگن یاردم نینگ کینگه‌ییشی دیر.
یمنده توقنشوولرنینگ کۉپه ییشی بیلن، سۉنگگی هفته لرده سعودی نینگ نفت تأسیساتلری و باشقه زیربنا لریگه قرشی حوثیلرنینگ هجوملری کۉپه یگن. یمن ایچیده، رسمی لر ایتدیلر که، دوشنبه کونی حوثیلرنینگ سعودی حمایه سیده گی دولتی خوفسیزلیک کوچلری نینگ بیر تعلیمی کمپینی هجوم قیلیشی، ۵۸ کیشی نینگ اۉلیمیگه سبب بۉلگن.
منبع: رویترز
🌐
