قطرلیک یوغاری مرتبه لی بیر رسمیی، افغانستان نینگ کېله جگی افغانلر رهبرلیگیده و بو مملکت نینگ حاکمیت و مستقل لیگیگه تۉلیق حرمت بیلن بیر کینگ قورساقلی سیاسی جریان آرقه لی تعیین اېتیلیشی کېره ک لیگینی تأکیدله‌دی. بو بیان دوحه‌ده‌گی افغانستان اوچون هماهنگلیک گروهی ییغیلیشیده ایتیلدی.
قطر تشقی ایشلر وزیرلیگی نینگ گزارشیگه کۉره، مذکور مملکت نینگ خلق ارا همکارلیکلر ایشلری بۉییچه دولت وزیری مریم بنت علی بن ناصر المسند، بو سۉزلرنی سه‌شنبه کونی، ۲۸ میزان، بو ایکّی کونلیک ییغیلیش نینگ آچیلیشیده بیان قیلگن. ۲۰ و ۲۱ اکتوبر کونلری اۉتکزیله‌دیگن بو ییغیلیش، افغانستان وضعیتی حقیده بحث قیلیش اوچون ییغیلگن تورلی دولت‌لر و خلق ارا تشکیلاتلر نماینده لریگه میزبانلیک قیله‌دی.
خانم المسند خلق ارا جمعیتدن، خصوصاً سویس، بیرلشگن ملت‌لر تشکیلاتی، دنیا بانکی و باشقه شریکلرگه افغانستان خلقی بیلن دواملی تعهد و حمایتلری اوچون قدردانلیک بیلدیردی. او، افغانستان حاضرگی شرایطده هر قچانگی دن کۉپراق خلق ارا جمعیت نینگ دواملی تعاملی، آیدین اولویتلری و عملي همکارلیکلریگه احتیاجی بارلیگینی آچیقله‌دی.
قطر دولت وزیری مملکتی نینگ ۲۰۱۳ نچی میلادی ییلدن بېری افغانستان بحرانی اوچون تینچلیک یۉللرینی فعال شکلده حمایت قیلیب کېلگنینی ایسلتدی. قطر بو مدتده مختلف افغان تامانلر اۉرته‌سیده و شونینگدېک اولر بیلن خلق ارا شریکلر اورته‌سیده صحبتلرنی آسانلشتیریشده مهم رول اۉینه‌گن.
او، بو ییغیلیشلرگه میزبانلیک قیلیش دوحه نینگ دیپلماتیک سعی و حرکتلری نینگ بیر قسمی بۉلیب، دنیا دقتینی افغانستانگه جلب قیلیش و او مملکت خلقیگه حمایت یۉللرینی تاپیش اوچون اېکه نینی قۉشیمچه قیلدی. اونینگ ایتیشیچه، افغانستانده‌گی ثبات فقط او مملکت خلقی نینگ رفاهی اوچون حیاتي اېمس، بلکه منطقه وی خوفسیزلیک، اقتصادی علاقه‌لرنی رواجلنتیریش و خلق ارا تینچلیکنی سقلش اوچون هم یوقاری اهمیتگه اېگه دیر.
بو ییغیلیش افغانستان نینگ بویوک اقتصادی و بشری قیینچیلیکلر بیلن روپه‌رو بۉلگن بیر پیتده اۉتکزیلماقده و خلق ارا جمعیت طالبان حکومتی بیلن تعامل و افغانستان خلقینی حمایت قیلیش اوچون بیر هماهنگ یانداشو تاپیشگه حرکت قیلماقده.
منبع: قطر تشقی ایشلر وزیرلیگی
🌐
