قندهار ولایتی نینگ خوفسیزلیک مسئوللری، بو ولایتده بیر باله نی اۉغیرلش عیبی بیلن اوچ کیشی نی قولگه آلگنلرینی ایتماقده لر. بو کیشیلر باله نی اۉغیرلگندن سۉنگ، اونینگ عایله سیدن پول طلب قیلگنلر.
قندهارده طالبان نینگ امنیه قوماندانلیگی سۉزچیسی اسدالله جمشید، رسانه‌لرگه بو عملیات نینگ دقیق معلومات قولگه کیریتیلگندن سۉنگ عملگه آشیریلگنینی ایتدی. اونینگ سۉزلریگه کۉره، قولگه آلینگن کیشیلر میوند اسملی بیر باله نی قندهار شهری نینگ یېتینچی خوفسیزلیک حوزه سی مربوطاتیدن اۉغیرلگنلر.
او، آدم اۉغیرلاوچیلر باله نی نامعلوم بیر جایگه آلیب بارگندن سۉنگ، اونینگ عایله سی بیلن تماس آلیب، قوییب یوباریش بدلیده پول طلب قیلگنلرینی قۉشیمچه قیلدی. باله نینگ عایله سی موضوع نی خوفسیزلیک کوچلریگه خبر بیرگن و عامللرنی تانیش و قولگه آلیش اوچون تیکشیرولر باشلنگن.
قندهار امنیه قوماندانلیگی نینگ سۉزچیسی، خوفسیزلیک کوچلری نینگ کشفی و استخباراتی یۉللر قوللب، آدم اۉغیرلاوچیلرنینگ یاشیرین جایینی تانیشگه موفق بولگنلرینی تاکیدله دی. بیر عملیات جریانیده، آدم اۉغیرلاوچیلیک بیلن عیبلنگن هر اوچ کیشی قولگه آلینیب، اۉغیرلنگن باله هم ساغ-سلامت عایله سیگه تاپشیریلدی.
جناب جمشید قولگه آلینگن کیشیلرنینگ کیملیگی و اولر تامانیدن طلب قیلینگن پول مقداری حقیده کۉپراق تفصیلات بیرمه دی، لیکن اولرنینگ دوسیه سی نینگ قۉشیمچه تیکشیرولر اوچون عدلی و قضایی نهادلرگه تاپشیریلیشینی ایشانتیریب ایتدی.
جنایی جرم‌لر، اۉزگچه پول اوچون آدم اۉغیرلاش، افغانستان نینگ کتته شهرلری، جمله دن قندهارده، اساسی خوفسیزلیک قیینچیلیکلرینن بیری سنله دی. طالبان حکومتی نینگ خوفسیزلیک مسئوللری، خوفسیزلیکنی تامینلشده اۉز قدرتینی کۉرسه تیش اوچون، مرتب روشده تورلی جرم‌لر بیلن عیبلنگن کیشیلرنینگ قولگه آلینگنیدن خبر بېره دیلر.
بو بیر حالده که، مملکت نینگ تورلی منطقه‌لریده یشاوچیلر هلی هم جنایی جرم‌لرنینگ یوز بېریشی و قضایالرگه اۉز وقتیده ییتیب باریلمسلیکدن شکایت قیلماقده لر. قندهارده بو کیشیلرنینگ قولگه آلینیشی، بو ولایتده گی باشقه جرمی گروهلرگه بیر آگاهلنتیریش پیامی بولیشی ممکن.
منبع: طلوع نیوز
🌐
