قطر واسطه چیلری ایران، امریکا و اسرائیل اۉرته سیده گی توقنشوو لرنی توخته تیش اوچون سعی و حرکتده، تهرانگه ینگی بیر کیلیشوو لایحه سی نی تقدیم قیلدی. رویترز خبر آژانسی نینگ معلوماتیگه کۉره، مذاکره لردن خبردار بیر رسمی نینگ ایتیشیچه، ایران نینگ شو هفته نینگ آخریگه چه بو ریجه گه جواب بېریشی کوتیلماقده.
گزارش اساسیده، ینگی لایحه ده ایکّی تامان نینگ خواطر لرینی حل قیلیش اوچون یېتّی کونلیک بیر زمان جدول تعیین قیلینگن و اونده تهران و واشنگتن عملگه آشیریشی کېره ک بۉلگن کونده لیک ایشانچ قازانیش تدبیر لری شامل ایتیلگن. اوشبو رسمی نینگ قۉشیمچه قیلیشیچه، بو کیلیشوو نینگ اجراسی کېله سی هفته نینگ باشلریده باشلنیشی ممکن.
بیر نیچه مملکت بو کیلیشوو نینگ اجراسیگه ضامن صفتیده عمل قیله دی. قطر پاکستان بیلن بیرگه، فبروری آییدن بویان ایران بیر تاماندن و امریکا و اسرائیل ایکّینچی تاماندن باشلنگن اوروش نی توخته تیش اوچون واسطه چیلیک حرکت لرینی رهبرلیک قیلماقده. بو توقنشوو لر دنیا کیمه چیلیک و نفت عرضه سی نی جدی شکلده اخلال قیلگن.
اوشبو خبردار منبع نینگ سۉزلریگه کۉره، تهرانده یکشنبه کونی اۉتکزیلگن ییغیلیشدن آلدین، اسرائیل باش وزیری بنیامین نتانیاهو نینگ شو هفته جریانیده ایرانگه قرشی ینگی هجوم لر باشلشی ممکن لیگی حقیده خواطر لر موجود اېدی. عین پیتده، امریکا جمهور رئیسی دونالد ترمپ هم اۉز تهدید لرینی تکرارله گن.
بونگه قرشی، ایران خوفسیزلیک رسمی لری رویترز گه ایتگنلر که، هجوم لرنینگ قیته باشلنیشی صورتیده، تهران فارس کۉرفزیده گی سوو آستی کیبل لریگه هجوم قیلیش اوچون مفصل ریجه لر تیارله گن. بو وضعیت، حالتلرنینگ نازک ایکنینی و دیپلوماتیک سعی و حرکت لرنینگ اهمیتی نی کۉرسته دی.
آلدینگی واسطه چیلیک حرکت لر جون آییده موقت بیر تینچلیک کیلیشوو نی یوزگه کېلتیرگن اېدی، لیکن اوشبو کیلیشوو هرمز تنگه سی بۉییچه اختلاف لر سببلی تیزده بوزیلیب و ناکام بۉلگن اېدی.
منبع: رویترز
🌐
