امریکا نماینده‌لر مجلسی تشقی علاقه‌لر کمیته‌سی نینگ دموکرات قناتی، ترامپ اداره‌سی نینگ افغان پناه جوی‌لرینی چیقاریش برنامه‌سینی «شرمنده قیلووچی» دیب اتَب، بو کیشیلرنی افغانستانگه قَیتیب یوباریش اولر و عایله‌لری نینگ حیاتی نی طالبان تامانیدن خطرگه قۉییشی حقیده آگاهلنتیردی.
بو کمیته سه‌شنبه کونی، ۱۲ عقرب ده، ایکس اجتماعی ترماغیده بیر پیامده یازدی: «بیزنینگ افغان متفقلریمیز عسکرلریمیز بیلن ییلکه مه-ییلکه اوروشدیلر و جان بېردیلر. حاضر ترامپ اداره‌سی اولر و عایله‌لرینی طالبان تامانیدن اذیت و حتی اۉلیمگه دوچ کېلیشلری ممکن بۉلگن بیر جایگه قَیتیب یوبارماقچی.» بو پیامده تأکیدلنگن که «بو ایش شرمنده قیلووچی دیر و امریکا نماینده‌لیک قیله‌دیگن هر نرسه گه ضد دیر.»
بو تیزکین رېاکتسییا نیویارک تایمز روزنامه‌سیده بیر گزارش نشر ایتیلگندن سۉنگ یوز بېردی. بو گزارش فاش قیلدی که ترامپ اداره‌سی کمیده ۱۵۰ افغان پناه جویینی لوئیزیانا ایالتیده توتقونگه آلگن و اولرنی آلدین پاکستانگه و سۉنگره قوروقلیک یۉلی آرقهلی افغانستانگه چیقاریشنی ریجه لشتیرماقده.
ایتیلیشیچه، توتقونگه آلینگنلر اره‌سیده امریکا کوچلری نینگ افغانستانده‌گی حضوری دوریده اوشبو کوچلر بیلن همکارلیک قیلگن کیشیلرنینگ قریب‌لری هم بار. بو کیشیلر ۲۰۲۱-ییلده سابق دولت سقوطی و طالبان نینگ ینه قدرتگه کیلیشیدن سۉنگ، مخصوص مهاجرت ویزه‌لری یا-ده پناه جویلیک یۉللری آرقهلی امریکاگه کیلگن ایدیلر.
پناه جویلر حقوقینی حمایه قیلووچی گروهلر، بو کیشیلرنی افغانستانگه قَیتیب یوباریش، اولرنینگ تشقی کوچلر بیلن همکارلیک سابقه‌سینی نظره توتگنده، اولر اوچون اۉلیملی نتیجه‌لرگه ایگه بۉلیشی ممکن لیگینی آگاهلنتیردیلر. بوندن آلدین هم ایکّی حزبدن بیر گروه امریکالیک قانونچیلر، تشقی ایشلر و ایچکی خوفسیزلیک وزیرلریگه بیر نامه ده بو چیقاریش برنامه‌سینی تیزلیک بیلن توخته‌تیشنی طلب قیلگن ایدیلر.
ایکی اون ییللیک اوروشده امریکا کوچلری یانیده تورگن افغان متفقلرینی حمایه قیلیش، عنعنوی روشده هم دموکرات و هم جمهوریچی حزبلرنینگ موافقتیده‌گی بیر موضوع بۉلگن. شو بیلن بیرگه، ترامپ اداره‌سی نینگ سخت مهاجرت سیاستلری بو موضوعنی ایکّی حزب اورته‌سیده‌گی اختلاف نینگ اساسی نقطه لریدن بیریگه ایلنتیرگن و بو پناه جویلر تقدیرلری باره‌سیده جدی خواطرلرنی اویغاتگن.
منبع: نیویارک تایمز
🌐
