رویترز خبری آژانسی سوریه و امریکا منبعلریگه تیه‌نیب خبر بېریشیچه، دمشق سعودیه عربستانیگه چه‌کلنگن ساندگی حربی کوچلرینی یوبارگن. اوشبو اقدامدن مقصد، حوثیلرگه قرشی کوره‌شیش بۉییچه سعودیه و یمن کوچلریگه کینگه‌ش و حربی تعلیم بېریش اېکنی بیلدیریلگن.
رویترز معلوماتیگه کۉره، سوریه‌لیک ایکّی حربی منبع سۉنگّی هفته‌لرده اۉنلب سوریه‌لیک حربی سعودیه عربستانیگه یۉل آلگنینی تایید قیلگن. بو کوچلر اۉز حربی تجربه‌لرینی سعودیه و یمن کوچلری بیلن بۉلیشه‌دی.
بیر یوقاری مرتبه‌لی امریکا رسمیسی جمعه کونی ۱۵ عقرب رویترزگه ایتدی، سوریه‌لیک مربی و مصلحتچیلر سعودیه کوچلریگه ییللر دوامیده‌گی جنگ تجربه‌سینی اۉرگه‌تیش اوچون اوشبو مملکتگه بارگنلر. سوریه منبعلری تعلیم و مصلحتچیلیک اصل وظیفه اېکنینی، بیراق اولر نینگ ماموریتی کینگه‌یشی ممکنلیگینی هم قۉشیمچه قیلدی.
رویترز بوندن آلدین میزان آییده هم دمشق نینگ یمن حوثیلریگه قرشی ریاضگه حربی یاردَم کۉرسه‌تیش احتیمالینی تېکشیره‌یاتگنی حقیده خبر بېرگن اېدی. اوشبو گزارشگه کۉره، هجوملردن مدافعه قیلینیشی یا-ده یمن قانونی حکومتی حمایه‌سیده‌گی عملیاتلرده اشتراک ایتیش تَنلاولری مۉلجللنگن.
امریکا رسمیسی شونینگدېک، واشنگتن دمشقنی احتیاطلی بۉلیشگه چقیریشینی ایتدی، چونکه یمن تنازعسیگه کیریش سوریه‌نی ییریک منطقوی اوروشلرگه تارتیشی ممکن. حالبوکی دمشق شو پیتگچه اوشبو مسئله‌لردن اۉزینی چېتده توتیب کېلماقده اېدی.
بونگه قره‌مسدن، بیر یوقاری مرتبه‌لی سوریه دیپلماتی حربی کوچلر یوباریلگنی توغریسیده‌گی گپلرنی وقتدن ایلگری دب اتَب، دمشق اوچون داخلی خوفسیزلیک و قَیته قوریش بیریچی اۉرینده اېکنینی تأکیدله‌دی. اونینگ ایتیشیچه، مدافعه بیتیملری یالغوز تعلیم، مصلحت و تجربه الماسیش چارچۉبسی بیلن چېکلنگن.
اوشبو دفاعیی همکارلیک بیتی‌می چارشنبه کونی ۱۳ عقرب سوریه جمهور رئیسی احمد الشرع نینگ ریاضگه قیلیگن سفری و سعودیه ولیعهدی محمد بن سلمان بیلن اوچره‌شووی دوامیده امضالندی. سوریه مدافعه وزیرلیگی و سعودیه حکومتی رویترز نینگ سوراوویگه حاضرچه جواب قَیتَرمه‌گن.
منبع: رویترز
🌐
