محلی منبعلر، طالبان استخباراتی کوچلری سابیق محلی قوماندان عبدالغنی علی‌پور نینگ سابیق اورین‌باسری محمدزمان رزمنده‌نی قولگه آلگنینی تایید قیلدیلر. منبعلر نینگ ایتیشیچه، طالبان کوچلری دوشنبه کونی رزمنده نی بامیان ولایتی نینگ یکاولنگ تومنیده اوشله‌گنلر.
طالبانگه یقین بعضی رسانه‌لر و ترماقلر، محمدزمان رزمنده پاکستاندن قیتگنیدن کېین قولگه آلینگنینی معلوم قیلدی. بیراق، طالبان حکومتی نینگ رسمیلا‌ری حاضرگه‌چه اوشبو حبس گه آلیش سببلری خصوصیده هیچ قنده‌ی مناسبت بیلدیرمه‌گن.
«قوماندان شمشیر» نامی بیلن مشهور عبدالغنی علی‌پور، افغانستان نینگ مرکزی حدودلری، اینیقسه میدان وردک ولایتیده تنیقلی محلی قوماندانلردن بیری اېدی. او اوتمیش حکومت دوریده دولتی کوچلر و شونینگدېک طالبان گه قرشی قوراللی توقنه‌شولر آلیب بارگن اېدی.
علی‌پور میدان وردک ولایتی نینگ بهسود تومنیده کوچیلر و ییرلیک یشاوچیلر توقنه‌شوویدن کېین قوراللی بیر ترمز توزگن اېدی. ۱۳۹۷-ییلده اونینگ کوچلری بیلن حکومت حربی‌لری اورته‌سیده قانلی توقنه‌شولر یوز بېریب، علی‌پور کابلده حبسگه آلینگن، اما بیر مدت سونگ بوشه‌تیلگن اېدی.
محلی منبعلر نینگ معلوم قیلیشیچه، اوتمیش نظام قوله‌شی آرتیدن علی‌پور نینگ حربی تشکیلاتی ترقه‌تیلیب، اوزی ایرانگه کېتگن. شونینگدېک، اونینگ قوراللی کیشیلری افغانستانده هیچ قنده‌ی سیاسی یا حربی فعالیت آلیب بارمه‌گن.
بو منبعلر تصدیق قیلیشیچه، محمدزمان رزمنده جمهوریت توزومی ییقیلگنیدن بیری علی‌پور بیلن حربی یا سیاسی همکارلیک قیلمه‌گن و طالبان تامانیدن اونی اوشلب توریلیشی بویچه انیق ایب اعلان قیلینمه‌گن.
منبع: محلی منبعلر و طالبانگه یقین رسانه‌لر
🌐
