نورستان ولایتی نینگ یشاووچیلری طالبان حکومتی نینگ جلغوزه و چهارمغز ترقه‌تیش اوچون سالینه‌دیگن سالیقنی خېلی کۉپه‌یتیریب یوبارگنینی بیلدیردیلر. محللی اهالی نینگ ایتیشیچه، طالبان نینگ خادملری هر بیر سیر جلغوزه‌دن ۵۰۰ افغانی و هر بیر سیر چهارمغزدن ۱۰۰ افغانی سالیق آلماقده‌لر.
نورستان ولایتی نینگ مندول تومنی یشاووچیلریدن بیرقنچه‌سی رسانه‌لرگه ایتیشیچه، بوندن آلدین بیر قاپ جلغوزه‌دن که ییتی سیرگه یقین آغیرلیگی بار اېدی یالغوز ۱۰۰ افغانی سالیق آلینر اېدی. اولرنینگ اورغولشیچه، حاضرگی سالیق بیر نېچه برابردور و باغدارلر بو پولنی تۉلشگه کوچلری یېتمه‌یدی.
محللی منبعلر نینگ معلوماتیگه کۉره، اوشبو ینگی تعرفه‌لر طالبان حکومتی نینگ نورستان ولایتیده‌گی زراعت و مالداری ریاستی تامانیدن بلگیلب بېریلگن. اوشبو اداره خادملری یۉللرده هیداووچیلرگه رسمی خط بېریب، اولردن پول ییغیب آلماقده‌لر.
باشنده‌لر نینگ قید اېتیشیچه، بو سالیق ییغیش ایشلری مندول، نورگرام و دوآب تومنلریده دوام اېتماقده. اوشبو لایحه میزان آیی نینگ بیرینچی کونی بیلن جلغوزه ییغیش موسمی باشلنیشی بیر وقتده یۉلگه قۉییلگن.
غرب نورستان یشاووچیلری نینگ معلوم قیلیشیچه، کۉپینچه عائله‌لر نینگ دارامدی جلغوزه، چهارمغز و لولیا ساتیلیشیدن تأمینلنه‌دی. اولر بو محصوللرنی لغمان بازاریگه آلیب باریب، اونینگ اۉرنیگه اون، برنج و یاغ ساتیب آله‌دیلر، بیراق یۉلده سالیق پوستیگه دچ کیله‌دیلر.
معلوماتلرگه کۉره، کونده بو اوچ تومندن لغمان سری ۲۰ دن ۲۵ گچه موتر قاتناو قیلماقده و بیر قنچه کونلرده ۱۰۰ سیر جلغوزه یۉنه‌تیله‌دی. اهالی نینگ اقتصادی احوالی آغیر اېکنی اوچون طالبان والیسیگه بو سالیقنی کمه‌یتیریشنی سۉره‌گنلر.
منبع: افغانستان انترنشنل
🌐
