افغان ایواک تشکیلاتی امریکا نینگ مهاجرت اداره‌سی ۱۶-نوامبردن سونگ پناه‌جولرنی افغانستانگه قیته‌ریش ریجه‌سینی قیته باشله‌ماقچی اېکنینی معلوم قیلدی. مذکور تشکیلات امریکا کانگرسیدن افغانلر نینگ چیقاریلیشی نینگ آلدی اولینیشینی سوره‌گن.
افغان ایواک معلوماتیگه کۉره، حاضرگی وقتده امریکا فدرال محکمه‌لری بیر قطار افغان پناه‌جولر نینگ افغانستان و پاکستانگه چیقاریلیشینی وقتینچه‌لیک تۉختاتیب قۉیگن. بیراق مهاجرت اداره‌سی اۉز قراریده دوام اېتسه، ۱۶-نوامبردن سونگ حمایه‌چی تشکیلاتلر قنده‌ی چاره کۉریشی هنوز انیق اېمس.
افغان ایواک باشلیغی شاون ون‌دایور نینگ ایتیشیچه، دونالد ترامپ حکومتی کابل قوله‌شی آرتیدن امریکاگه اۉتکزیلگن و هنوز باشپناه تاپمه‌گن افغانلر نینگ وقتینچه‌لیک یاشش رخصتنامه‌سینی بیگار قیلگن. اونگه کۉره، دایمی یاشش و ایشلش رخصتنامه‌لری بۉییچه عریضه‌لر کۉپلب آی اۉتیشیگه قره‌می کۉریب چیقیلمه‌گن.
اونینگ سۉزلریگه کۉره، بو کیشیلر اینیقسه بشردوستلیک رخصتنامه‌سی اساسیده امریکاگه کېلگن اېدی، اما اونینگ اعتباری اداغگه یېتگن. شونینگدېک، اوتگن ییلی امریکا حکومتی افغانلر اوچون وقتینچه‌لیک حمایه‌لی حیات لایحه‌سینی هم بېکار قیلدی.
تشکیلات رهبری جیسون کرو و سم لیکاردو اسملیک ایکّی نماینده نینگ افغانلرنی قوللب-قوتلش ریجه‌سینی هم آلقیشله‌دی. اوشبو لایحه‌گه کۉره، افغانستان ۲۰۲۹-ییلگچه وقتینچه‌لیک حمایه‌لی درجه‌ده توریب، افغانلر قانونی ره‌ویشده حیات کېچیریش امکانیتیگه اېگه بۉله‌دی.
تکلیفی لایحه امریکا ایچکی خوفسیزلیک وزیرلیگیدن بیومتریک و خوفسیزلیک تېکشیریشلری ایاقلنگندن سونگ، ۹۰ کون ایچیده قرار چیقاریشنی طلب قیله‌دی.
افغان ایواک نینگ بیلدیریشیچه، اوشبو لایحه‌نی مجلس صحیفه‌سیگه چیقاریب آوازگه قۉییش اوچون اېکّی حزبدن کمیده ۲۱۸ قول قۉییش یازمه‌سی لازم بۉله‌دی.
منبع: افغان ایواک
🌐
