لاهایده‌گی خلق‌ارا جنایی محکمه‌سی نینگ ایکینچی دستلبکی بۉلیمی افغانستان بۉییچه اېسکی تېکشیریش دوسیه‌سینی یاپیش قرارینی چیقاردی و طالبان حرکتلری بۉییچه تېکشیریشلر علیحده بیر دوسیه‌ده دوام اېتیشینی معلوم قیلدی.
پنجشنبه کونی ۲۱ عقربده اعلان قیلینگن اوشبو قرار اساسیده، امریکالیک کوچلر و داعش خراسان گروهی نینگ دعوا قیلینگن جنایتلری بۉییچه اېسکی دوسیه چوکاتیده آلیب باریله‌یاتگن تېکشیریشلر هم تۉخته‌تیلدی.
محکمه قاضیلری دادستانلیک اوشبو اېسکی دوسیه دوامیده کۉپراق تېکشیریشلر و تعقیبلرنی اونملی روشده آلیب باره آلیشینی کۉرسه‌ته آلمه‌گنینی بیلدیردیلر.
قاضیلر اۉز قرارلریده یازگنلر: «شعبه شونده‌ی حسابلَیدیکی، دادستانلیک افغانستان وضعیتی دایره‌سیده قۉشیمچه تېکشیریش یا قضایی تعقیبنی تاثیرلی روشده آلیب باره آلیشینی کۉرسه‌ته آلمه‌گن.» اولر شونینگدېک وقت اۉتیشی بیلن ثبوتلرگه قول تاپیش چکلنگنینی قید اېتگنلر.
اوشبو یاپیلگن دوسیه ۲۰۰۳ میلادی ییلدن کېینگی دورنی اۉز ایچیگه آلگن بۉلیب، سابق افغان خوفسیزلیک کوچلری، طالبان، امریکالیک حربی‌لر و سی‌آی‌ای خادملریگه تېگیشلی دعوالرنی اۉز ایچیگه آله‌ر اېدی. امریکالیک کوچلر بۉلیمی ۲۰۲۱ ییلدن بېری عملاً تۉخته‌ب قالگن اېدی و داعش بۉییچه تېکشیریشلر هم اېندی توگه‌دی.
بیراق طالبان حکومتی گه تیگیشلی عمللر بۉییچه تېکشیریش «افغانستان وضعیتی ۲» ناملی ینگی دوسیه چوکاتیده اۉز کوچیده قاله‌دی.
اوشبو تېکشیریش ایکّی اساسی یۉنه‌لیشنی، یعنی عیاللر و قیزلرگه قرشی جنایتلرنی همده سیاسی، قومی یا مذهبی باقیشلر اساسیده اینسانلرنی تعقیب قیلیشنی اۉز ایچیگه آله‌دی.
طالبان رهبری هبت‌الله آخوندزاده، ستره محکمه باشلیغی عبدالحکیم حقانی، معارف وزیری حبیب‌الله آغا و عالی تحصیلات وزیری ندامحمد ندیم گه قرشی چیقاریلگن تۉرت ته توتیش حکمی اۉز کوچیده قالماقده.
خلق‌ارا جنایی محکمه دادستانلیگی رویترز و اسوشیتدپرس آژانسلریگه ایکینچی بۉلیم قاضیلری نینگ قراریگه قرشی قیته کۉریب چیقیش عریضه‌سی تاپشیرگنینی بیلدیردی.
منبع: رویترز و اسوشیتدپرس
🌐
