پاکستان قوراللی کوچلری قومندانی مارشال عاصم منیر افغانستان چېگرهسی یقینیدهگی شیمالی وزیرستان مرکزی میرانشاه شهریگه باریب، تروریزم تهدیدینی تۉلیق یۉق قیلیش کېرهکلیگینی معلوم قیلدی.
پاکستان قوراللی کوچلری نینگ عامهوی علاقهلر ادارهسی (ISPR) معلوماتیگه کۉره، عاصم منیر خیبر پختونخوا ولایتیده حربی افسر و عسکرلر بیلن کۉریشدی و منطقهدهگی خوفسیزلیک وضعیتی بۉییچه معلومات آلدی.
پاکستان حربی قومندانی شونینگدېک تروریزمگه قرشی کورهشده خیبر پختونخوا پولیس کوچلری نینگ فداکارلیگی و فعالیتلرینی مقتهدی.
اوشبو سفر پاکستان بیلن طالبان حکومتی اۉرتهسیدهگی مناسبتلر سۉنگگی بیر یریم ییلده جدی سوووغان بیر وضعیتده عملگه آشیریلماقده دیر. اسلامآباد افغانستان تپراغیدن قوراللی گوروهلر فایدهلنهیاتگنینی ادعا قیلهدی.
بیراق طالبان حکومتی بو ادعالرنی رد اېتیب، افغانستان تپراغیدن قۉشنی اولکهلرگه قرشی استفاده قیلینیشیگه رخصت بېریلمهسلیگینی بیلدیرگن.
شونینگدېک پاکستان منبعلری جنوبی وزیرستان نینگ انگور اده منطقهسیده طالبان کوچلری بیلن پاکستان حربیلری اۉرتهسیده ینگی تۉقنهشوولر یوز بېرگنینی خبر بېردی، بیراق رسمی بیانات نشر اېتیلمهگن.
بوندن آلدینگی چېگهره تۉقنهشوولری عاقبتیده تینچ اهالی جان بیرگن اېدی و طالبان بعضی عایلهلرنی انگور اده منطقهسیدن باشقه جایلرگه کۉچیرگن اېدی.
منبع: پاکستان قوراللی کوچلری نینگ عامهوی علاقهلر ادارهسی (ISPR)
🌐