د طالبانو ویاند، ذبیح الله مجاهد، له پاکستان سره د وروستیو تاوتریخوالو په غبرګون کې اعلان وکړ چې دا ډله د افغانستان د دفاع پوره وړتیا لري. هغه ټینګار وکړ چې د خاورې دفاع «فرض او عبادت» دی او طالبان اړینو پوځي تجهیزاتو ته لاسرسی لري، که څه هم جزئیات یې د امنیتي دلایلو له مخې نه په ډاګه کوي.
مجاهد ادعا وکړه چې پاکستان د امریکا او ځینو پوځي کړیو په همکارۍ د افغانستان د بې ثباته کولو هڅه کوي. هغه وویل چې اسلام آباد باید پر کابل د تسلط خوب ونه ویني او طالبانو مخکې ثابت کړې چې کولی شي لوی قدرتونه مات کړي.
دا توندې څرګندونې په داسې حال کې کیږي چې د کابل او اسلام آباد ترمنځ سرحدي او لفظي نښتې زیاتې شوي دي. طالبان پاکستان تورنوي چې د بهرنیو قدرتونو په نیابت د سیمې امنیت له خطر سره مخ کوي.
