د محمد محقق په مشرۍ د افغانستان د خلکو د وحدت اسلامي ګوند لسګونو غړو په لویدیځ زون کې له دغه ګوند څخه خپله استعفا اعلان کړه . دغو غړو چې شمیر یې شاوخوا سلو تنو ته رسیږي، د خپلې پریکړې لامل د “ډله ایزې پریکړې نشتوالی” او د ګوند د مشرتابه لخوا د غړو نظرونو ته نه پاملرنه بللې ده.
په هرات کې د دغه ګوند مخکښو څیرو لکه زارع حقجو او غلام علي اخلاقي په یوه ګډه اعلامیه کې ویلي چې د ګوند مشرتابه په وروستیو کلونو کې له داسې کسانو ملاتړ کړی چې ټولنیز ځایګی نه لري . دوی ټینګار وکړ چې د افغانستان په اوسنیو پیچلو شرایطو کې د اغیزمن خدمت لپاره یو خپلواک او نوي سیاسي جریان ته اړتیا لري.
دغو سیاسي فعالانو ویلي چې استعفا یې له سیاست څخه د وتلو په معنی نه ده، بلکې خپل فعالیتونه به په یوه نوي چوکاټ کې پرمخ وړي . که څه هم محمد محقق هڅه وکړه چې له ناراضه غړو سره خبرې وکړي، خو دا هڅې بې پایلې وې او په دغه ګوند کې اختلافات نور هم ژور شوي دي.
په لویدیځ زون کې د وحدت اسلامي ګوند د غړو ډله ایزه استعفا
