د بالیووډ مشهور کمیدین راجپال یادو د محکمې لخوا د پور نه ورکولو او چک باونس کېدو په قضیه کې په شپږ میاشتو بند محکوم او تهار زندان ته ولېږل شو. د ډیلي محکمې د هغه وروستۍ غوښتنه رد کړه، چې دا د دغه محبوب هنرمند لپاره یو لوی ټکان و.
په دې سختو شرایطو کې، سونو سود، چې په خیریه کارونو مشهور دی، د خپل همکار ملاتړ ته راوړاندې شو. سونو اعلان وکړ چې راجپال یادو ته یې په خپل نوي فلم کې رول ورکړی او د تړون پیسې به ورته مخکې له مخکې ورکړي ترڅو د هغه مالي ستونزې حل شي. هغه راجپال یو با استعداده لوبغاړی وباله.
د سونو سود دې کار یو ځل بیا د خلکو زړونه وګټل. په داسې حال کې چې راجپال یادو باید خپله د بند موده تېره کړي، د خپلو همکارانو ملاتړ ورته هیله بخښي چې له خوشې کېدو وروسته به بېرته سینما ته راستون شي.
