د افغانستان د ازادۍ جبهې اعلان وکړ چې د تخار ولایت په مرکز تالقان ښار کې یې په یوه هدفي چریکي برید کې د طالبانو ډلې ته تلفات اړولي دي. د دې جبهې د خبرپاڼې له مخې، دا پیښه د چهارشنبې په ماښام د شپږمې امنیتي حوزه اړوند د پوهنتون په سړک کې رامنځته شوې ده.
په دې عملیاتو کې چې د ازادۍ جبهې په وینا په «برقآسا» ډول ترسره شول، د طالبانو د ډلې دوه غړي وژل شوي او دوه نور ټپیان دي. همدارنګه ویل شوي چې په دې برید کې د دې ډلې یو موټر هم ویجاړ شوی دی.
د طالبانو د ډلې سیمه ییزو چارواکو تر اوسه د دې ادعا په اړه څه نه دي ویلي. په وروستیو میاشتو کې په شمالي ولایتونو کې د مخالفینو د بریدونو زیاتوالي، په دې سیمو کې نوي امنیتي ننګونې رامنځته کړي دي.
