د اوکراین ولسمشر ولودیمیر زلنسکي ویلي، سره له دې چې مخکې ژمنې شوې وې، خو په اروپا کې د پاتریوت دفاعي سیسټم د توغندیو جوړولو لپاره د امریکا د جواز مسله لا نه ده حل شوې. هغه وویل چې اوکراین او د ناټو شریکان لکه پولینډ او رومانیا ګډ تولید ته چمتو دي .
زلنسکي په یوه ویډیویي وینا کې ټینګار وکړ چې د روسیې د بریدونو پر وړاندې د خلکو د ژوند ژغورلو لپاره ډېرو توغندیو ته اړتیا ده. هغه له دې امله شکایت وکړ چې امریکا د جواز ورکولو په برخه کې پر خپلو ژمنو عمل نه دی کړی او باید دا پروسه چټکه شي .
دا څرګندونې په داسې حال کې کېږي چې په جینوا کې خبرې اترې پیل شوي دي. اوکراین هڅه کوي چې په خپله سیمه کې د وسلو تولید زیات کړي ترڅو د هوايي دفاع سیسټم پیاوړی کړي او له خپلې خاورې دفاع وکړي .
