طالبان حکومتی گه باغلیق رسانه لر، تخار ولایتیده بیر آلتین کانی نینگ قوله شی آرتیدن، اون نفر کانچی نینگ یېر آستیده قالیب کېتگنینی خبر بېردیلر. بو واقعه چاه آب تومنی نینگ «سمتی» منطقه سیده یوز بېرگن و کانچیلرنی قوتقریش اوچون سعی و حرکتلر دوام اېتماقده.
طالبان نظارتی آستیده فعالیت قیلووچی باختر خبر آژانسی، چهارشنبه آخشامی، ۸ میزانده، تخار والی سی، امنیه قوماندانی و باشقه محلی طالبان مسئوللری نینگ بو واقعه نی تیکشیریش اوچون حادثه جایگه بارگنینی خبر قیلدی. دستلبکی گزارشلرگه کۉره، بو اون کانچی یېرنینگ چوقورلیگیده ایشله یاتگن پیتده، کان نینگ بیر قسمی نینگ قوله شی سببلی محبوس قالیب کېتگنلر.
شونینگ بیلن بیرگه، طالبان گه یقین بولگن حریت رسانه سی، کۉپراق تفصیلات تقدیم اېتگن. حریت نینگ یازیشیچه، بو واقعه چهارشنبه کونی آخشام یوز بېرگن و توپراق آستیده قالگن کانچیلر هلی هم تیریک. بو خبر اولرنینگ موفقیتلی قوتقریلیشیگه بولگن امیدلرنی آرتیرگن.
کانلردن غیر معیاری و غیر مسلکی شکلده قازیب آلیش افغانستانده بیر جدی معما دیر. کۉپلب کانلر، خصوصاً اوزاق منطقه لرده، محلی اهالی تامانیدن ابتدایی و خطرلی اصوللر و آلاتلر بیلن قازیب آلینه دی، که بو هر دایم قوله ش، پارتلش و گاز توتیشی کبی حادثه لر خطرینی یانیده آلېب کیله دی.
اۉтган ییللرده، بدخشان، سمنگان و تخار کبی تورلی ولایتلرده شو کبی واقعه لرده اونلب کانچی جانینی قولدن بېرگن. دولتی نظارت نینگ یوقلیگی، فقیرلیک و باشقه ایش فرصتلری نینگ بولمسلیگی، اهالی نی کانلرده خطرلی ایشلشگه مجبور قیلووچی سببلردن دیر.
محدود امکاناتلرگه اېگه بولگن محلی قوتقروو گروه لری، قالیب کیتگن کانچیلرگه ییتیشیش اوچون حرکت قیلماقده لر. بو کانچیلرنینگ وضعیتی و قوتقروو عملیاتی نینگ نتیجه سی هلی انیق اېمس و همه چاه آب تومنیدن کۉپراق خبرلرنی کوتماقده.
منبع: باختر خبر آژانسی
🌐
