پاکستان اردوسی نینگ ایتیشیچه، طالبان حکومتی نینگ قندهار ولایتیده گی والیسی ملا شیرین، تخمیناً بیر آی آلدین بلوچ حربی لری، پاکستان طالبان تحریکی و القاعده نماینده لری نینگ مشترک بیر ییغیلیشیگه مېزبانلیک قیلگن. پاکستان اردوسی نینگ سۉزچیسی نینگ ادعاسیگه کۉره، بو ییغیلیش نینگ مقصدی پاکستان ایچیده هجوم لرنی کۉپه یتیریش اوچون بو گروه لر آره سیده هماهنگلیک ایجاد ایتیش اېدی.
پاکستان اردوسی نینگ سۉزچیسی شریف چودری، پنجشنبه کونی بیر خبر ییغیلیشیده بو جلسه نینگ ۴ سنبله ده قندهارده اۉتکزیلگنینی ایتدی. او، بو ییغیلیشده بلوچستان آزادلیک اردوسی، هند یریم آرالیده گی القاعده و پاکستان طالبان تحریکی نینگ قوماندان لریدن حافظ گل بهادر گروهی نینگ نماینده لری قتنشگنینی معلوم قیلدی.
چودری نینگ ایتیشیچه، بو گروه لرنینگ نماینده لری کوچ لرنی سفربر قیلیش و اۉز آره لرده هماهنگلیک تۉغریسیده صحبت قیلگنلر. او، بو گروه لر جدا حالده فعالیت قیلгенده «شدتلی ضربه ییه دی» و شو سبب دن بیر بیرلری بیلن هماهنگ بۉلیشگه قرار قیلگنلرینی قۉشیمچه قیلدی.
پاکستان اردوسی سۉزچیسی نینگ ادعا قیلیشیچه، بلوچ حربی لری نینگ نماینده لری اۉز گروه لری نینگ کوچ ییغیش و اوروشیشده قیینچیلیککه دوچ کېلگنینی ایتیب، حافظ گل بهادردن انسان کوچینی اولرنینگ اختیاریده قۉییشنی سۉره گنلر. چودری، بو کیشی لرنینگ بلوچستان آزادلیک اردوسی نینگ کییمینی کییگن دن سۉنگ، اوشبو گروه نینگ هجوم لریده قتنه شیشی کېره ک اېدی دیب ادعا قیلدی.
او، بلوچستان آزادلیک اردوسی بیلن پاکستان طالبان تحریکی آره سیده ایدئولوژیک جهت دن هېچ قنده ی بیر مشترک نقطه یۉق لیگینی، لیکن «پول و طالبان حکومتی» بو فرقلی گروه لرنینگ بیر ییرگه یېغیلیشیگه عامل بۉلگنینی ایتدی.
بو بیانات، سۉنگگی آی لرده پاکستان طالبان تحریکی و بلوچ آیریلیشچی گروه لری آره سیده هماهنگلیک و همکارلیک نینگ کۉپه یگنی حقیده گی گزارش لرنینگ ترقه لگن و بلوچستان نینگ پشتون منطقه‌لریده قوراللی هجوم لرنینگ آرتیب کیتگن بیر پیتده بیان ایتیلماقده.
طالبان حکومتی آلدین افغانستان توپراغیدن پاکستانگه قرشی قوراللی گروه لرنینگ فعالیت لری بیلن باغلیق ادعا لرنی کوپ مرته رد قیلگن. طالبان سۉزچیسی ذبیح الله مجاهد، بو گزارش لرنی اولرنینگ حکومتی نی بدنام قیلیش اوچون «شوایعات و تبلیغات» دیب اته گن و طالبان مقام لری نینگ بونده ی فعالیت لرگه رخصت بیرمس لیگینی ایتگن.
منبع: پاکستان اردوسی
🌐
