لیتوانیا چېگره چیلری اۉزلرینی افغانستان و عراق وطنداشی ایتیب تانیتگن و بلاروس چېگره سی آرقه لی بو مملکتگه کیرگن ۳۵ قاچقیننی قولگه آلگنیدن خبر بېردی. بو واقعه پنجشنبه کونی آقشام لیتوانیا نینگ جنوبیده گی وارنا منطقه سیده یوز بېرگن.
لیتوانیا چېگره چیلری نینگ ایتیشیچه، بو گروه قاچقینلرنینگ حرکتی چپکلیای محافظت ایتیلگن منطقه سیده گی نظارت سیستملری آرقه لی انیقلنگن. انیقلنگندن سۉنگ، بو کیشیلرنی ایزلب تاپیش و قولگه آلیش اوچون کېنگ کۉلملی بیر عملیات باشلنگن.
گزارشلرگه کۉره، مهاجرلر چېگره دن اۉتگندن سۉنگ تانیلمه سلیک اوچون بیر نېچه کیچیک گروهگه بۉلینگنلر، لیکن چپکلیای باتقاقلی منطقه سیدن اوزاقلیشیشدن آلدین چېگره چی کوچلر تامانیدن قولگه آلینگنلر.
لیتوانیا مقام لری نینگ ایتیشیچه، قولگه آلینگنلرنینگ همه سی تخمیناً ۲۰ دن ۳۰ یاشگچه بۉلگن اېرکلردیر. اولر آره سیده، ۱۱ کیشی نینگ کیملیک حجتی بار اېدی، حال آنکه قالگن ۲۴ کیشی اۉز کیملیگینی اثباتلاوچی هېچ قنده ی حجت تقدیم اېتمه گن.
بو واقعه، اروپا اتفاقی نینگ بلاروس بیلن شرقی چېگره لریده گی مهاجرت بحرانی دوام اېتیب تورگن بیر پیتده یوز بېرماقده. لیتوانیا و بلاروسگه چېگره داش باشقه مملکتلر، مینسک حکومتینی اروپا اتفاقیگه سیاسی باسیم یریم قیلیش اوچون مهاجرلردن ابزاری شکلده فایده له نیشده عیبلنماقده.
لیتوانیا چېگره چیلری تامانیدن نشر ایتیلگن آمارلر اساسیده، جاری میلادی ییل باشیدن بویان، بلاروس چېگره سیدن بو مملکتگه مینگ و ۶۶۱ قاچقین نینگ کیریشیگه تۉسقینلیک قیلینگن. بو آمار قاچقینلرنینگ بو خطرلی یۉلدن اروپا اتفاقیگه یۉل تاپیش اوچون دواملی سعی و حرکتلرینی کۉرسه ته دی.
قولگه آلینگن بو ۳۵ قاچقین نینگ سرنوشتی هلی هم معلوم ایمس، لیکن معمولاً بو کیشیلر قانونی باسقیچلرنی اۉتگندن سۉنگ قاچقینلر کمپلریگه انتقال بېریله دیلر یاکه اۉزلری کېلگن مملکتگه قیته یوباریله دیلر.
منبع: زرین محلی منبعلری
🌐
