د لیتوانیا سرحدي ساتونکو د ۳۵ پناه غوښتونکو د نیولو خبر ورکړی چې ځانونه یې د افغانستان او عراق اتباع معرفي کړي او د بیلاروس له پولې څخه دغه هېواد ته داخل شوي دي. دا پېښه د پنجشنبې په ماښام د لیتوانیا په سویل کې د وارینا په سیمه کې رامنځته شوه.
د لیتوانیا د سرحدي ساتونکو په وینا، د دې ډلې حرکت د چپکلیای په خوندي سیمه کې د څارنې سیسټمونو له لارې کشف شو. له پېژندلو وروسته، د دوی د موندلو او نیولو لپاره پراخ عملیات پیل شول.
راپورونه وايي چې کډوال له پولې تر اوښتو وروسته په څو کوچنیو ډلو وېشل شوي وو ترڅو ونه پېژندل شي، خو مخکې له دې چې د چپکلیای له جبه زارې سیمې څخه لرې شي، د سرحدي ځواکونو له خوا ونیول شول.
د لیتوانیا چارواکي وايي، ټول نیول شوي کسان د ۲۰ او ۳۰ کلونو ترمنځ نارینه دي. له دې ډلې څخه ۱۱ تنو د هویت اسناد لرل، په داسې حال کې چې ۲۴ نورو د خپل هویت د ثابتولو لپاره هیڅ ډول اسناد نه دي وړاندې کړي.
دا پېښه په داسې حال کې رامنځته کېږي چې له بیلاروس سره د اروپايي ټولنې پر ختیځو پولو د کډوالۍ بحران دوام لري. لیتوانیا او نور له بیلاروس سره ګډ پوله لرونکي هېوادونه د مینسک حکومت تورنوي چې پر اروپايي ټولنې د سیاسي فشار راوستلو لپاره له کډوالو څخه د وسیلې په توګه کار اخلي.
د لیتوانیا د سرحدي ساتونکو له خوا د خپرو شویو شمېرو له مخې، د روان کال له پیل راهیسې، له بیلاروس څخه دغه هېواد ته د ۱۶۶۱ پناه غوښتونکو د ننوتو مخه نیول شوې ده. دا شمېره د دې خطرناکې لارې له لارې اروپايي ټولنې ته د لارې موندلو لپاره د کډوالو دوامداره هڅې ښیي.
د دغو ۳۵ نیول شویو پناه غوښتونکو برخلیک لا نه دی معلوم، خو معمولاً دا کسان له قانوني پړاوونو وروسته د کډوالو کمپونو ته لېږدول کېږي او یا هغه هېواد ته بېرته ستنېږي چې له کومه راغلي دي.
سرچینه: زرین محلي سرچینې
🌐
