ننگرهار ولایتیده گی طالبان حکومتی نینگ امنیه قوماندانلیگی، بو ولایت نینگ چپرهار و بتی کوت ولسوالی لریده یوز بېرگن ایکّی علیحده ترافیک حادثه سی عاقبتیده تۉرت کیشی نینگ جان بېرگنی و ۱۳ کیشی نینگ یره لنگنینی اعلان قیلدی.
ننگرهارده طالبان امنیه قوماندانلیگی نینگ سۉزلاوچیسی سید طیب حماد، جمعه کونی، ۱۰ میزان ده، هر ایکّی حادثه نینگ عین شو کونده یوز بېرگنینی ایتدی. او، حیداوچیلرنینگ احتیاطسیزلیگی بو واقعه لرنینگ اساسی عاملی ایکن لیگینی قۉشیمچه قیلدی.
بیرینچی حادثه ده، بتی کوت ولسوالی سی مربوطاتیده بیر «سوزوکی» نوعیده گی موتر یۉلدن چیقیب آغدریلیب کیتگن. حماد نینگ ایتیشیچه، بو واقعه ده ایکّی کیشی جانینی یۉقاتگن و عیاللر و باله لر هم شامل بۉلگن ۱۳ کیشی یره لنگن.
ایکّینچی حادثه چپرهار ولسوالی سی نینگ «دولت زی» منطقه سیده یوز بېرگن. ننگرهار امنیه قوماندانلیگی نینگ سۉزلاوچیسی بو واقعه ده بیر «سراچه» نوعیده گی موتر یۉلدن اۉتیب تورگن ایکّی باله بیلن تۉقنشگنینی توضیحله دی.
افسوسکی، بو حادثه ده هر ایکّی باله واقعه جاییده جان بېرگن. بیرینچی حادثه نینگ یره دارلری تداوی اوچون یقینده گی شفاخانه لرگه انتقال بېریلگن.
ننگرهارده طالبان امنیه قوماندانلیگی نینگ سۉزلاوچیسی هر ایکّی واقعه نینگ اساسی سببینی حیداوچیلرنینگ احتیاطسیزلیگی و ترافیک قانونلری و اصوللریگه رعایت قیلمه سلیک دیب بیلدیردی. او برچه حیداوچیلردن احتیاط بیلن حیداشلرینی سۉره دی.
افغانستانده ترافیک حادثه لری وطنداشلرنینگ اۉلیمی و یره له نیشی نینگ اساسی سببلریدن بیری دیر. روا بۉلمه گن تېزلیک، نادرست سبقت آلیشلر، یۉللرنینگ بوزوقلیگی، ترافیک قانونلریگه رعایت قیلمه سلیک و حیداوچیلیک پیتیده موبایل تلفن دن فایده له نیش، همیشه بو اۉلیملی حادثه لرنینگ اساسی سببلری صفتیده ذکر ایتیله دی.
منبع: ننگرهارده طالبان امنیه قوماندانلیگی
🌐
