پاکستان نینگ بلوچستان ایالتی مرکزی کویته شهری یقینیده بیر هدفلی هجومده، بیر ۱۸ یاشر هزاره ییگیت هلاک بۉلیب و باشقه ایککی کیشی یره لندی. بو حادثه جمعه آخشامی، ۱۰ میزان ده، بیر گروه ییگیتلر نامعلوم قوراللی کیشیلر تامانیدن اوققه توتیلگن پیتده یوز بېرگن.
کویته ده گی افغانستان اینترنشنل خبرچیسی عبدالکریم ملاخیل، بو ییگیتلر هزاره تاون یشاووچیلری ایکنینی و بولان منطقه سیده سیر-سیاحتدن سۉنگ اویگه قیته یاتگن پیتده هجومگه اوچره گنلرینی گزارش بېردی. بو هجوم نینگ قربانی مصطفی دیب اتلگن.
بلوچستان پولیسی بو باره ده تیکشیرولرینی باشله گن، لیکن حاضرگه قدر هجومچیلرنینگ کیملیگی و انگیزه‌سی انیقلنمه گن. هیچ قنده‌ی گروه هم بو هجوم مسئولیتینی اۉز بوینیگه آلمه‌گن.
بو هجوم کویته ده گی هزاره جمعیتیگه قرشی ایککی اون ییلدن بېری دوام ایتیب کیله یاتگن فرقه ای و هدفلی هجوملر سلسله سی نینگ اینگ سونگگیسی دیر. بو شهرنینگ هزاره لری کۉپ مرته هلاکتلی هجوملر هدفی بۉلگنلر.
بو هجوملرنینگ اینگ قانلی لریدن بیری ۲۰۰۳ نچی ییل جولای آییده بیر مسجدگه قیلینگن هجوم اېدی که کمیده ۵۳ کیشی نینگ اۉلیمیگه سبب بۉلگن اېدی، و ۲۰۱۳ نچی ییل جنوری و فبروری آیلریده گی ایککی کته پارتلش که کمیده ۱۸۰ هزاره نینگ جانینی آلگن اېدی.
حقوق بشر کزه تووچی سازمانی آلدینراق بو دواملی هجوملر کویته ده گی هزاره جمعیتی نینگ حرکت ایتیشی، اقتصادی فعالیتلری و تعلیمگه ایریشیشیگه جدی چیکلاولر قۉیگنینی بیلدیرگن اېدی.
منبع: افغانستان اینترنشنل
🌐
