افغانستان نینگ ۱۹ یاشگه چه بولگن ملی کریکت تیمی بنگله دېش و عمان تیملریگه قرشی ییتّی بیر کونلیک اوچره شوو اوتکزیش اوچون، کېله‌سی هفته عمانگه سفر قیله‌دی. بو اویینلر افغانستان تیمی نینگ ۲۰۲۶ نچی ییلگی ۱۹ یاشگه چه بولگن ایرککلر آسیا جامی مسابقه لریگه تیارگرلیگی نینگ بیر قسمی دیر.
افغانستان کریکت بورد نینگ اعلامیه‌سیگه اساسن، بو تیم ۱۰ اکتوبرده عمانگه سفر قیلیشی قرار قیلینگن. افغانستان تیمی دستلب بیش مسابقه‌لیک بیر سلسله ده بنگله دېش نینگ ۱۹ یاشگه چه بولگن تیمی بیلن میدانگه توشه‌دی. بو اوچره شوولر ۱۳، ۱۵، ۱۸، ۲۰ و ۲۳ اکتوبر کونلری عمان کریکت اکادمیه‌سی میدانیده بولیب اوته‌دی.
بنگله دېش بیلن اویینلر توگه گنیدن سۉنگ، یاش افغان ملی اویینچیلری میزبان تیم، عمانگه قرشی باشقه ایکی بیر کونلیک مسابقه اوتکزه دیلر. بو ایکی اویین ۲۷ و ۳۰ اکتوبر کونلری اوشه میدانده ریجه لشتیریلگن.
کریکت بورد، بو مسابقه‌لرنی اوتکزیشدن مقصد، یاش اویینچیلرنی آسیا جامی مهم رقابتلری اوچون تیارلش ایکنینی ایتگن. بو رقابتلر جاری میلادی ییل نینگ نوامبر آیی نینگ باشلریده باشلنیشی ریجه‌لنگن. بو تورنمنت افغانستان کریکتی نینگ ینگی ظهور قیله‌یاتگن استعدادلرینی نمایش ایتیش اوچون مهم بیر فرصت بوله‌دی.
کریکت بورد شونینگدیک بو سفر اوچون تیم اویینچیلری نینگ رویخطینی هم اعلان قیلگن. سهیل خان تیم کاپیتانی صفتیده سیلنگن. تیم نینگ باشقه اعضالری عبارتدیر: فرید زدران، سبحان علی، نعمان سالارزی، فیصل مبارز، طاهر سروری، عابدالله عابد، حمزه علی خیل، امیر حمزه، سمیع مبارز، محمد علی، لطف‌الله، عبدالله همدرد، عمران محمدی و نورعلی نیازی.
بوندن تشقری، هیبت خان، حکمت‌الله و بلال سلیمان خیل ذخیره اویینچیلر صفتیده بو سفرده تیم گه همراهلیک قیله‌دیلر. بو ییتّی مسابقه، مربی لر هیئتی اوچون آسیا جامی اوچون تیم نینگ نهایی ترکیبینی بهالنتیریش اوچون یخشی بیر فرصت بوله‌دی.
منبع: افغانستان کریکت بورد
🌐
