نورستان ولایتی دن ییتیب کیلگن محلی منبعلرنینگ خبر بیریشیچه، بوگون چهارشنبه، ۱۵ میزان ایرته لب، اوشبو ولایت نینگ کامدیش ولسواللیگیده طالبان کوچلری بیلن افغانستان آزادلیک جبهه سی اورته سیده آغیر توقنشولر باشلنگن.
افغانستان آزادلیک جبهه سی نینگ سوزلاوچیسی، نصرت الله فاتح، بو خبرنی تصدیقلب، طالبان نینگ اوشبو جبهه نینگ موضع لریگه قرشی کینگ کولملی هجوملر باشلگنی نی ایتدی. منبعلرنینگ ایتیشیچه، بو هجوملر درونلر و آغیر قورال لردن فایده لنگن حالده عملگه آشیریلگن.
گزارشلرگه کوره، توقنشوولر کامدیش ولسواللیگی نینگ تاغلیک و اوتیش قیین بولگن منطقه‌لریده یوز بیرگن. پاکستان بیلن مشترک چېگره گه ایگه بولگن بو ولسواللیک، اوزینی ستراتژیک موقعیتی سببلی هر دایم طالبان حکومتیگه قرشی قوراللی گروهلرنینگ فعالیت مرکزی بولیب کیلگن.
افغانستان آزادلیک جبهه سی، ۲۰۲۱ نچی ییل آگست آیی ده طالبان نینگ قیته دن قدرت گه کیلیشی آرتیدن تشکیل تاپگن بیر نیچه قوراللی گروهلردن بیری دیر. بو جبهه اساساً مملکت نینگ شمالی و شمال شرقی ولایتلریده فعالیت قیله دی و وقت ناوقت طالبان کوچلریگه قرشی هجوملر اویوشتیره دی.
حاضرگه قدر بو توقنشوولردن کیلگن احتمالی تلفات حقیده ایکّی تامان دن هم هیچ قنده ی تفصیلات ترقه تیلمه گن. طالبان حکومتی هم بو توغریده حاضرگچه هیچ قنده ی فکر بیلدیرمه‌گن.
نورستانده یوز بیرگن بوگونگی توقنشوولر، افغانستان نینگ بعضی قسم لریده طالبان حاکمیتیگه قرشی پراکنده قوراللی مقاومت نینگ دوام ایته یاتگنی نی کورسه ته دی. طالبان نینگ بوتون مملکت نی اوز کنترولی گه آلگنیگه قره مسدن، اولر آزادلیک جبهه سی و ملی مقاومت جبهه سی کبی گروهلر تامانیدن خوفسیزلیک چالش لری بیلن دوچ کیلماقده لر.
منبع: Zarin TV sources
🌐
