افغانستان آزادلیک جبهه سی چهارشنبه کونی، ۱۵ میزان ده، نورستان ولایتی نینگ کامدېش ولسواللیگیده یوز بېرگن بیر توقنه شووده طالبان نینگ ۱۱ عضوی اۉلدیریلیب و باشقه سېککیز تنی یره لنگنینی اعلان قیلدی. بو جبهه بیر خبرنامه ده ایتگنکه، اوشبو توقنه شوو طالبان جنگچیلری بو جبهه نینگ کماندو لری موضع لریگه هجوم قیلگنیدن سۉنگ باشلنگن.
آزادلیک جبهه سی نینگ اعلامیه سیگه کۉره، طالبان کوچلری اوتگن کونلرده «شکست ییب و آغیر تلفات کۉرگنیدن سۉنگ»، چهارشنبه ایرته لب ینه کامدېشده بو جبهه نینگ کوچلریگه هجوم قیلگن. بو جبهه ادعا قیلیشیچه، اونینگ کوچلری بو هجوملرنی قیترگن و بیر «کینگ و هماهنگ» قرشی هجوم بیلن، طالبان جنگچی لرینی چېکینیشگه مجبور قیلگنلر.
آزادلیک جبهه سی بو توقنه شووده اۉز کوچلریگه ییتیب آلگن احتمالی تلفات حقیده معلومات بېرگن ایمس. شونده ی بیر حالده، محلی منبعلر افغانستان اینترنشنل بیلن صحبتده نورستانده طالبان و آزادلیک جبهه سی آره سیده توقنه شوو یوز بېرگنینی تصدیقله گنلر. بیراق، بو جبهه نینگ طالبان تلفاتی و منطقه لرنی کنترول قیلیش حقیده گی ادعا لری هلی هم مستقل منبعلر تامانیدن تصدیقلنگن ایمس.
طالبانگه قرشی بو جبهه شونینگدیک ادعا قیلگنکه، اونینگ کماندو لری کامدېش نینگ بعضی منطقه لریده که اولرنینگ ایتیشیچه «آزاد قیلینگن» دیر، اۉز سنگر لریده «فعال و قدرتمند حضور» لری بار. خبرنامه ده کیلگنکه، آزادلیک جبهه سی نینگ کوچلری کامدېش اطرافیده گی قیشلاقلر و منطقه لر نینگ وضعیتیگه تولیق تسلط گه اېگه دیرلر.
آزادلیک جبهه سی نینگ ایتیشیچه، طالبان اۉز یره در لرینی کامدېش ولسواللیگی و نورستان ولایتی مرکزی بولگن پارون شهری نینگ صحی مرکز لریگه انتقال بېرگنلر. بو ادعا هم مستقل روشده تصدیقلش ممکن ایمس.
افغانستان آزادلیک جبهه سی سونگگی پیتلرده بیر نیچه ولایتده طالبان حکومتی گه قرشی اۉز هجوم لرینی کینگه‌یتیرگن. بو جبهه چهارشنبه کونی بدخشان و کاپیسا ولایت لریده هم طالبانگه قرشی باشقه ایکّی هجومدن خبر بېریب و ادعا قیلگنکه، بو ایکّی هجومده کمیده ییتّی طالبان جنگچیسی نی اۉلدیرگن.
منبع: افغانستان اینترنشنل
🌐
