پشتون تحفظ غورځنگی نینگ رهبری منظور پشتین، خیبر پشتونخواه ده حربی حکومت اعلان ایتیلگنی گه قرشی عکس العملده، «پنجابی استعمار» دن قوتولیش نینگ یگانه یۉلی آزادلیک یۉلی اېکنینی ایتگن. او بو بیاناتی نی پاکستان مرکزی حکومتی بیلن تحریک انصاف حزبی آره سیده گی کیله یاتگن کېسکینلیک لر چاغیده بیان قیلگن.
جناب پشتین اۉز اجتماعی صفحه سیده یازگن که، پاکستان ده دیموکراسی بۉلسه هم یا دیکتاتوری بۉلسه هم، هر ایکّی حالتده قدرت پنجابی لر قۉلیده دیر؛ یا پنجابی سیاستچیلر یا پنجابی جنرال لر. اونینگ سۉزلریگه کۉره، هر ایکّی طبقه پشتون لر نینگ دشمنلری دیر.
او قۉشیمچه قیلگن: «پشتون لر اوتگن سکسان ییل جریانیده باشقه همّه یۉل لرنی سینب کۉردیلر، لیکن حقارت دن باشقه نتیجه آلمه دیلر.» بو پشتون حقوقی فعالی تاکیدله گن که، حاضر آزادلیک یۉلی نی قبول قیلیش زمانی یېتیب کېلگن.
منظور پشتین شونینگدېک ادعا قیلگن که، «پنجابی استعمار» همیشه پشتونخواه نی اۉز قرار لرینی تطبیق قیلیش اوچون بیر لابراتوار صفتیده ایشلتگن. بو موضوع، خصوصاً خوفسیزلیک و اقتصادی سیاست لر ساحه سیده اۉزینی کۉرستگن، که منتقد لر نینگ ایتیشیچه، کۉپینچه محلی اهالی ضرریگه تمام بۉلگن.
پشتون تحفظ غورځنگی نینگ رهبری اۉز بیاناتی نینگ باشقه بیر قسمیده، پاکستان اردوسی تامانیدن تینچلیک سېور نمایشچیلر نینگ قولگه آلینیشی نی هم قاره له گن. بو قولگه آلیش لر حربی حکومت گه قرشی سونگّی اعتراض لر جریانیده یوز بېرگن.
پشتون تحفظ غورځنگی، نېچه ییلدن بېری پاکستان ده پشتون لر حقوقی اوچون کوره شیب کېله دی، همیشه مرکزی حکومت و پاکستان اردوسی نینگ پشتون نشین منطقه لرده گی سیاست لریدن تنقید قیلیب کېلگن. اولر هدفی قتل لر، اجباری یۉقالیب کېتیش لر و بو منطقه لرده انسان حقوقلری نینگ پامال ایتیلیشی گه خاتمه بېریلیشی نی طلب قیله دیلر.
منبع: Zarin TV
🌐
