طالبان حکومتی نینگ رهبری هدایتی و ارشاد، حج و اوقاف وزیرلیگی نینگ هماهنگلیگی بیلن، بلخ ولایتیده حکومت مسئوللری و دیني عالملر آره سیده بیر ییغیلیش اۉتکزیلدی. بو ییغیلیش دن مقصد، هماهنگلیکنی کوچه‌یتیریش و دیني و دولتی ایشلرنی یخشیراق تطبیق قیلیش دیب ایتیلگن.
بو ییغیلیشده، بلخ والی سی محمد یوسف وفا، ارشاد، حج و اوقاف وزیرلیگی نینگ معینلری، علما شوراسی نینگ اعضالری و بو ولایت نینگ تورلی اداره لری نینگ مسئوللری اشتراک قیلگن اېدیلر. اوشبو ییغیلیش بلخ ولایتی نینگ مرکزی، مزارشریف شهریده بۉلیب اۉتدی.
بیریلگن معلومات اساسیده، بو ییغیلیش طالبان رهبری شیخ هیبت الله آخندزاده نینگ بویروغی بیلن اۉتکزیلگن. بو، طالبان رهبریتی نینگ مرکز و ولایتلر آره سیده گی علاقه نی مستحکملش و شونینگدېک، حکومت پالیسی لری نینگ مملکت بۉیلب بیر خیل تطبیق ایتیلیشیدن ایشانچ حاصل قیلیش اوچون سعی و حرکتینی کۉرسه ته دی.
ییغیلیش اشتراکچیلری دولتی خذمتلر تقدیم ایتیلیشینی یخشی لش، جامعه ده عالملر رولی نی کوچه‌یتیریش، و دولتی اداره لر و اجتماعی حیاتده شریعت اصول لری نینگ تۉلیق تطبیق ایتیلیش یۉللری کبی تورلی موضوع لر حقیده بحث و فکر المشدیلر.
بلخ والی سی اۉز صحبتلریده دولتی اداره لر و دیني تشکیلاتلر آره سیده گی همکارلیک نینگ اهمیتیگه تاکیدلب، عالملردن خلققه یۉل-یۉریق کۉرسه تیش و حکومت برنامه لرینی قوللب قوتلشده فعال رول اۉینشلرینی سۉره دی.
بونده ی ییغیلیشلر طالبان نینگ ایکّینچی مرته قدرت گه اېریشگنیدن بېری مملکت نینگ تورلی ولایتلریده منظم شکلده اۉتکزیلیب کېلماقده. طالبان حکومتی بو ییغیلیشلر آرقه لی، دیني عالملر نینگ حمایتی نی جلب قیلیش و خلق آره سیده اۉز دیني مشروعیتی نی کوچه‌یتیریش گه اورینماقده.
منبع: Zarin TV
🌐
