رویټرز اژانس د دوو سرچینو په حواله ویلي، تمه ده چې د سعودي عربستان، ترکیې او پاکستان لوړپوړي چارواکي، چې د "مکې تړون" غړي دي، د دوشنبې په ورځ، د لړم په څلورمه، ایران ته سفر وکړي. د راپور له مخې، دوی به په تهران کې له ایراني چارواکو سره د سیمه ییزې همغږۍ په اړه خبرې وکړي.
د سرچینو په وینا، په دې پلاوي کې به د سعودي عربستان د دفاع وزیر شهزاده خالد بن سلمان او د پاکستان د پوځ لوی درستیز عاصم منیر د خپلو هېوادونو استازیتوب کوي. په راپور کې د ترکیې د استازي نوم نه دی یاد شوی. دا سفر له ایران سره د دغه تړون له اعلان وروسته لومړنۍ همغږې او لوړې کچې غونډه ده.
دا لیدنه د څارونکو له خوا د تاوتریخوالي کمولو او د مستقیمو خبرو اترو د کانال جوړولو لپاره د هڅې نښه ګڼل کیږي. دا په داسې حال کې ترسره کیږي چې سیمه لا هم په منځني ختیځ کې د وروستیو تاوتریخوالو، د سمندري امنیت مسلو او ګډو امنیتي اندیښنو سره مخ ده.
د "مکې تړون" چې په دې وروستیو کې د سعودي عربستان، ترکیې او پاکستان ترمنځ رامنځته شوی، د دغو دریو هېوادونو ترمنځ د امنیتي او دفاعي همکاریو د چوکاټ په توګه پېژندل شوی دی. دا اتحاد د سیمه ییزو قدرتونو ترمنځ د ستراتیژیکو اړیکو د پیاوړتیا په لور یو ګام ګڼل کیږي.
په تهران کې د مکې تړون د دریو غړو هېوادونو د دفاعي او امنیتي چارواکو په یو وخت شتون کولی شي د دوه اړخیزو او څو اړخیزو امنیتي مسلو، لکه د سیمه ییز ثبات او د روانو بحرانونو مدیریت، په اړه د نظرونو د تبادلې لپاره زمینه برابره کړي.
که څه هم د دې غونډې د کره اجنډا جزئیات تر اوسه د ښکېلو غاړو له خوا په رسمي توګه نه دي اعلان شوي، خو تمه کیږي چې دا به د سیمه ییزو همکاریو د نوي پړاو پیل وي.
سرچینه: رویټرز
🌐
