بدخشان ولایتی نینگ شهربزرگ ولسوالیسیده گی محلی منبعلر، بیر توی مراسمیده موسیقی نینگ آلدی نی آلیش اوچون طالبان کوچلری نینگ مداخله سی آرتیدن اوروش یوز بېرگنینی ایتماقده. بو واقعه نتیجه سیده بیر طالب مقامی اۉلدیریلیب، ایکی طالب اعضاسی شامل تۉرت کیشی یره لنگن.
بو واقعه شنبه کېچه سی، ۲ عقربده، اوشبو ولسوالی نینگ وندیان قشلاغیده یوز بېرگن. محلی منبعلر یکشنبه کونی افغانستان اینترنشنل گه ایتگنلر کیم، طالبان کوچلری موسیقی و پتاقی آتیلیشینی توخته تیش اوچون توی مراسمیگه کیلگنلر.
منبعلرنینگ ایتیشیچه، اوروش طالبان کوچلری نینگ آلدین محلی اهالیگه قره ته اوق آتگنیدن سۉنگ باشلنگن. طالبان نینگ بو اقدامی قرشی عکس العمل گه روپه ره بۉلیب، زوروانلیککه سبب بۉلگن.
طالبان افغانستانده قدرت گه قیتیب کیلگنیدن بیری، موسیقی و اجتماعی ییغینلرگه جدی چیکلاولر قۉیگن. بو گروه موسیقی نی «حرام» دیب بیله دی و کۉپ مواردده بو چیکلاولرنی نظردن قاچیرگن کیشی‌لر بیلن توقنشگن.
کۉرگنلرنینگ ایتیشیچه، اوروش توگه گنیدن سۉنگ، طالبان کوچلری کмиده ۲۵ کیشی نی قولگه آلگنلر و منطقه ده اوی مه اوی تیکشیروولر و اهالینی آزار و اذیت قیلیش دوام ایتماقده.
بدخشانده گی محلی طالبان مسئوللری حاضرگچه بو واقعه و اونینگ تلفاتلری حقیده رسمی روشده فکر بیلدیرمه‌گنلر. بو حادثه ینه بیر بار طالبان نینگ اجراییوی روشلری و اونینگ افغانستان خلقی نینگ کونده لیک حیاتیگه تأثیری حقیده گی تشویشلرنی اورته گه قۉیماقده.
منبع: افغانستان اینترنشنل
🌐
