بدخشان ولایتیده گی محلی منبعلر، شهربزرگ ولسوالی سیده بیر توی مراسمیده موزیک قۉییلیشی نینگ آلدینی آلیش اوچون طالبان کوچلری نینگ مداخله سی آرتیدن شدتلی بیر توقنه شوو یوز بیرگنینی گزارش قیلماقده.
بو واقعه شنبه کېچه سی، اوچینچی عقرب ده، اوشبو ولسوالی نینگ وندیان قشلاغیده عتیق الله اسملی بیر کیشی نینگ توی مراسمیده یوز بیردی. افغانستان اینترنشنل بیلن صحبت قیلگن منبعلر نینگ ایتیشیچه، طالبان کوچلری موزیک قۉییلیشی و هوایی اوق اتیشلر (پتاقی) نینگ آلدینی آلیش اوچون توی جایگه بارگن اېدیلر.
بو مداخله نتیجه سیده، طالبان کوچلری و توی اشتراکچی لری آره سیده توقنه شوو باشلندی. محلی منبعلر نینگ ایتیشیچه، بو توقنه شوو جریانیده شهربزرگ ولسوالی سی اوچون طالبان پولیسی نینگ تروریزم گه قرشی کوره
ش مدیری، قاری عبدالهادی، اۉلدیریلگن. اوندن تشقری، ایکّی باشقه طالبان اعضاسی و کمیده ایکّی محلی یشاوچی هم شدتلی یره لنگن.
عینی شاهدلرگه کۉره، توقنه شوو طالبان کوچلری نینگ بیرینچی بۉلیب محل یشاوچی لری تامانیگه اوق اتیشی بیلن باشلنگن. طالبان نینگ بو اقدامی مراسم اشتراکچی لری نینگ قرشی واکنشی بیلن دوچ کېلیب و خشونت گه سبب بۉلگن.
بو واقعه دن سۉنگ، طالبان کوچلری توی مراسمیده حاضر بۉلگن کمیده ۲۵ محلی یشاوچی نی قولگه آلگن. منبعلر نینگ ایتیشیچه، منطقه ده طالبان تامانیدن اوی به اوی تلاشی قیلیش و خلق نی آزار بېریش دوام ایتماقده که بو ایش خلق آره سیده قۉرقینچ و وحشت یره تیشگه سبب بۉلگن. طالبان حکومتی هلی گچه بو واقعه نی رسمی روشده تاییدله مه گن.
طالبان ۱۴۰۰ نچی ییل اسد آییده قدرت گه قیتیب کېلگنیدن سۉنگ، بوتون افغانستانده هر تورلی موزیک ترقه تیش و تولید قیلیشنی منع قیلگن. بو گروه موزیک نی اسلامی شریعت گه خلاف دېب بیله دی و اولرنینگ امر به معروف و نهی از منکر کوچلری موزیک ترقه تیش مورد لری بیلن شدتلی برخورد قیله دی.
منبع: افغانستان اینترنشنل
🌐
