صربستان طلبه لر حرکتی تامانیدن حمایت قیلینگن سیلاو لیست یکشنبه کونی بولیب اوتگن وقتدن آلدینگی پارلمان سیلاویده کۉزگه کورینرلی غلبه گه ایریشیب الکساندر ووچیچ و اونینگ حزبی نینگ اون ییلدن آرتیق حاکمیتینی توگتدی.
رویترز خبر آژانسی تامانیدن گزارش قیلینگن ابتدایی تخمین لر، طلبه لر لیستی نینگ پارلمانده گی ۲۵۰ اوریندن ۱۳۵ بیلن ۱۴۰ آره سیده اورین قولگه کیریتیشینی کورسه ته دی. باش وزیرلیک مقامیگه قیتیش اوچون حرکت قیلگن سابق جمهور رئیس الکساندر ووچیچ، اوز مغلوبیتینی تن آلیب و رقیب لریگه تبریک ایتدی.
ووچیچ رهبرلیگیده گی «متحد صربستان» ائتلافی تقریباً ۳۸.۸ فایز رای و ۱۰۳ اورین بیلن ایکّینچی اوریننی ایگلله دی. بو نتیجه لر ۲۰۱۲ نچی ییلدن بویان ووچیچ رهبرلیگیده گی صربستان ترقی پرور حزبی نینگ تسلطی آستیده بولگن صربستانده بویوک بیر سیاسی اوزگریش حسابلنه دی.
بو وقتدن آلدینگی سیلاو تقریباً ایکّی ییل دوام ایتگن طلبه لر رهبرلیگیده گی کینگ قولاچلی اعتراضلردن سۉنگ بولیب اوتدی. بو اعتراضلرنینگ آلاوه سی ۲۰۲۴ نچی ییل نینگ بیرینچی نوامبر کونی نووی ساد شهری نینگ ریل یولی ایستگاهی نینگ سایه بانی ییقیلگنیدن سۉنگ توتشیب کېتدی که بو حادثه ده ۱۶ کیشی هلاک بولگن اېدی. معترضلر مقام لردن جوابگویی و فساد بیلن جدی کوره
ش طلب قیلدیلر، بو اتهام لرنی ووچیچ حکومتی هر دایم رد قیلیب کیلگن.
باشده کوچه اعتراضلری ایچیدن چیققن طلبه لر حرکتی تېزلیک بیلن جامعه نینگ کینگ قسم لری، جمله دن دانشگاه استاد لری، حقوقدانلر و هنرمندلرنینگ حمایتینی جلب قیلدی. نتیجه لر اعلان بولگنیدن سۉنگ پایتخت بلگرادده اون مینگلب کیشی کوچه لرگه چیقیب بو غلبه نی نشانله دی.
بو سیلاوده اشتراک میزانی تقریباً ۷۰ فایز گزارش قیلینگن که بو ۱۹۹۲ نچی ییلده یوگسلاوی ییقیلگنیدن بویان اینگ یوقاری آمارلردن بیری دیر. بو غلبه گه قره مسدن، حرکت هلی گچه باش وزیرلیک مقامی اوچون اوز رسمی نامزدینی معرفی قیلمه گن. اوشبو حرکت نینگ لیدرلیگینی قیلگن دانشگاه استادی ایلیا سردانوویچ، اساسی چهره لردن بیری حسابلنه دی.
منبع: رویترز
🌐
