قندهار ولایتیده گی محلی منبعلرنینگ ایتیشیچه، بو ولایت نینگ اسپین بولدک اولسوالیسیده بیر ایرکک اول خاتینی نی قتل قیلیب، سۉنگ اۉق آتیب اۉз حیاتیگه نقطه قۉیگن.
بو واقعه دوشنبه کونی، ۴ عقرب ده، توشدن سۉنگ اسپین بولدک اولسوالیسی نینگ «منار چوک» منطقه سیده یوز بېرگن. بو منطقه پاکستان بیلن چېگره گه یقین جایلشگن.
بیر منبع رسانه لرگه ایتگن که، اۉلدیریلگن ایرکک «اورنگ» ناملی بۉلیب، تخمیناً ۳۰ یاشر اېدی. اوشبو منبع نینگ ایتیشیچه، او اصلیده سرپل ولایتی نینگ یشاوچیسی بۉلگن، لیکن اوزون مدت دن بېری قندهارده یشب کیلگن.
حاضرگچه بو آچیقلی واقعه نینگ انگیزه‌سی و اصلی سببی انیقلنگن اېمس و محلی مسئوللر تامانیدن بو حقده قۉشیمچه تفصیلاتلر ترقه تیلمه‌گن. بو باره ده تیکشیرولر دوام ایتماقده.
بو واقعه، افغانستان بۉیلب عایله وی زوروانلیکلر، قوراللی قتللر و جنایی جرم‌لرنینگ آرتگنلیگی حقیده گی گزارشلر کېلیب تورگن بیر پیتده یوز بیرماقده. هر کونی تورلی ولایتلردن قتل نینگ کۉپلب موردلری خبر قیلینماقده.
بو واقعه دن بیر نیچه ساعت آلدین، منبعلر نورستان ولایتیده باشقه بیر ایرکک نینگ اۉلدیریلگنی حقیده هم خبر بېرگن اېدیلر. بو قتللرنینگ کۉپچیلیکی شخصی توقنشوولر، قوراللی اۉغیرلیکلر و عایله وی زوروانلیکلر نتیجه سیده یوز بېرگن دېب ایتیله دی و بعضیلری ایسه نامعلوم کیشیلر تامانیدن سرلی روشده عملگه آشیریله دی.
منبع: محلی منبعلر
🌐
