پاکستان نینگ کنر و هلمند ولایت لریگه قیلگن و تینچ اهالی نینگ اۉلیمیگه سبب بۉلگن هوا هجوم لریدن بیر کوندن کۉپراق اۉتگنیدن سۉنگ، هلی هم هېچ بیر مملکت بو هجوم لرنی رسمی روشده قاره لمه گن.
بیرلشگن ملت لر تشکیلاتی نینگ افغانستانده گی یاردم هیئتی دفتری (یوناما) آلدینراق بو هجوم لرده کмиده ۱۰ تینچ اهالی، که اکثریتی باله لر اېدی، اۉلدیریلگنی و باشقه ۹ کیشی نینگ یره لنگنینی تأییدله گن اېدی. یوناما، کشکینلیکنی کمه یتیریش و صحبت ضرورتینی تأکیدلش بیلن بیرگه، تینچ اهالیگه کۉپراق زیان ییتیشینی آلدینی آلیش اوچون خلق ارا قانون لرگه حرمت قیلیشنی طلب قیلگن.
طالبان حکومتی، بو واقعه نینگ تصویرلرینی ترقه تیب، پاکستان جنگی اوچاق لری نینگ یشاش اویلریگه قیلگن هجوم لرینی «تجاوز و جنایت» دیب اته ب، اونی شدتلی قاره له گن. بو گروه، اسلام‌آباد تامانیدن بونده ی حرکت لرنینگ فوری توختتیلیشینی ایسته‌گن.
باشقه تاماندن، پاکستان دولتی بو هجوم لرنینگ «غضب للحق» ناملی عملیات چرچوبه سیده و استخباراتی معلومات لر اساسیده بولیب اوتگنی و نتیجه سیده «۲۲ تروریست» اۉلدیریلگنینی اعلان قیلگن. اسلام‌آباد بو عملیاتنی اۉز ملی امنیتی نی سقلش اوچون ضروری دیب بیله دی.
خلق ارا جامعه نینگ سکوتی، افغانستان نینگ بعضی ایچکی سیاسی شخصیت لری نینگ بو هجوم لرنی قاره له گن بیر پیتده دوام ایتماقده. افغانستان نینگ سابق جمهور رئیسی حامد کرزی، بو هجوم لرنی شدتلی قاره له ب، اونی مملکت نینگ ملی حاکمیتینی پامال قیلیش دیب اته دی و اسلام‌آباد دن خصمانه سیاست لر اۉرنیگه، یخشی قۉشنیچیلیک و متمدنانه علاقه لر اساسیده حرکت قیلیشنی سۉره دی.
بو خلق ارا عکس العمل نینگ یۉق لیگی، پاکستان و افغانستانده گی طالبان اداره سی آره سیده گی چېگره کشکینلیک لری نینگ آرتیشیگه قرشی مملکت لرنینگ احتیاطکارانه یانداشووینی کۉرسته دی.
منبع: زرین تی وی گزارشی
🌐
