طالبان نینگ عامه ساغلیقنی سقلش وزیری نورجلال جلالی، روسیه ساغلیقنی سقلش وزیری میخائیل موراشکو بیلن بیر اوچره شووده، اوزاق مدتلی ساغلیق همکارلیکلرینی رواجلنتیریش و او مملکتدن دارو و طبی تجهیزاتلر وارداتی حقیده صحبت قیلگن. بو اوچره شوو افغانستان دارو کمچیلیگیگه روپه‌رو بۉلگن بیر پیتده یوز بېرگن.
طالبان عامه ساغلیقنی سقلش وزیرلیگی نینگ سۉزچیسی شرافت زمان امرخیل، شنبه کونی، ۱۱ میزان ده، جناب جلالی بو اوچره شووده روسیه دن واکسین و زمانه وی طبی تکنالوژی وارداتینی طلب قیلگنینی معلوم قیلدی. اونینگ قۉшимچه قیلیشیچه، عامه ساغلیقنی سقلش وزیری روسیه دن سیستم قوریش، ساغلیق خدمت لری نینگ کیفیتی نی یوکسلتیریش و طبی متخصص لرنینگ ظرفیتینی آشیریش بۉییچه بو گروه بیلن همکارلیک قیلیشنی سۉره گن.
جناب امرخیل نینگ ایتیشیچه، روسیه ساغلیقنی سقلش وزیری افغانستان ساغلیق بولیمینی کوچه‌یتیریش یۉلیده تخنیکی همکارلیک اوچون تیارلیگینی بیلدیرگن و مملکتی بو ساحه ده اۉز تخنیکی همکارلیکلرینی کینگه‌یتیریشگه تیار ایکنینی ایتگن. ایککی تامان همکارلیکنی آشیریش و ساغلیق علاقه لرینی رواجلنتیریشگه تأکید قیلدیلر.
روسیه دن دارو وارداتی اوچون بو درخواست، طالبان حکومتی پاکستان بیلن سیاسی کېسکینلیکلرنینگ آرتگنی سببلی تقریباً بیر ییلدن بېری بو مملکتدن دارو وارداتینی توخته‌تگن بیر شرایطده مطرح ایتیلماقده.
بو ممنوعیت افغانستان بازارلریده دارو نینگ جدی کمچیلیگیگه سبب بۉلگن. گرچه طالبان هند و ایران دن دارو وارداتیگه یوز توتگنلر، لیکن سوداگرلرنینگ ایتیشیچه، ایران دارولری نینگ کیفیتی قانیقرلی ایمس و بو ایککی مملکتدن واردات، پاکستان بیلن تجارت نینگ توخته‌شیدن کیلگن بۉشلیقنی تولیق تۉلدیریشگه قادر بۉلمه‌گن.
منبع: طالبان عامه ساغلیقنی سقلش وزیرلیگی
🌐
