د طالبانو د ترانسپورت او هوايي چلند وزارت وايي، چې په ټول هېواد کې یې د «ترانسپورتي حق
الخدمت» د ورکړې او راټولولو د بانکي کولو بهیر پیل کړی دی. دغه اقدام د عوایدو راټولولو په سیسټم کې د روڼتیا زیاتولو او د فساد مخنیوي په موخه ترسره کېږي.
دغه وزارت نن (سېشنبه، د لړم ۵مه) په یوه خبرپاڼه کې ویلي، چې د دې بهیر په ورته وخت کې پر موټر چلوونکو د بانکي کارتونو د وېش لړۍ هم پیل شوې ده. دا کارتونه موټر چلوونکو ته اجازه ورکوي چې خپلې پیسې د بانکي سیسټم له لارې په برېښنايي ډول ورکړي.
په خبرپاڼه کې له ټولو موټر چلوونکو غوښتل شوي، چې د بانکي کارتونو د ترلاسه کولو لپاره په خپلو ولایتونو کې د ترانسپورت ریاستونو او امریتونو ته مراجعه وکړي. دغه وزارت دا نه ده مشخصه کړې چې د دغو پیسو د راټولولو بانکي پروسه به په کومه موده کې په بشپړه توګه پلې شي.
تر دې وړاندې د طالبانو حکومت د سړکونو عواید او حق
العبور په دودیز ډول او د کاغذي فورمونو له لارې له موټر چلوونکو راټولول. دې طریقې تل د اداري فساد او د دې پیسو د یوې برخې د حیف و میل کېدو په اړه اندېښنې راپورته کړې وې.
کارپوهان په دې باور دي چې د تادیاتو د سیسټم ډیجیټل کول کولی شي د پام وړ فساد مخه ونیسي او د دولت د عوایدو په زیاتوالي کې مرسته وکړي. خو د دغه پلان بریا په ټول هېواد کې پر بانکي زیربناوو او بانکي خدمتونو ته د موټر چلوونکو د لاسرسي په کچه پورې اړه لري.
دا اقدام په افغانستان کې د مالي او اداري سیستمونو د عصري کولو لپاره د طالبانو د حکومت د پراخو هڅو یوه برخه ده. د طالبانو حکومت تر دې مخکې هم د ځینو نورو دولتي خدمتونو د ډیجیټل کولو هڅې پیل کړې وې.
سرچینه: اطلاعات روز
🌐
