طالبان حکومتی نینگ ترانسپورت و هواچیلیک وزیرلیگی، مملکت نینگ تمام ولایتلریده «ترانسپورتی خدمت حقی» نینگ تۉلاوی و ییغیب آلینیشی نی بانکلشتیریش جریانینی باشله گنینی معلوم قیلدی. بو اقدام عایدات ییغیب آلیش سیستمیده شفافیتنی آشیریش و فساد نینگ آلدینی آلیش مقصدی بیلن عملگه آشیریلماقده.
بو وزیرلیک بوگون (سه شنبه، ۵ عقرب) بیر اعلامیه ترقه تیب، بو جریان بیلن بیرگه حیداوچیلرگه بانکی کارت ترقه تیش هم باشلنگنینی ایتگن. بو کارت لر حیداوچیلرگه اۉز تۉلاو لرینی الکترونیک شکلده و بانکی سیستم آرقلی عملگه آشیریش امکانیتینی بېره دی.
اعلامیه ده تمام حیداوچیلردن اۉز بانکی کارت لرینی آلیش اوچون تیگیشلی ولایت لرده گی ترانسپورت ریاست لری و آمریت لریگه مراجعه قیلیش لری سۉره لگن. وزیرلیک بو پول نی ییغیب آلیش نی بانکلشتیریش جریانی قنچه مدت ایچیده تولیق عملگه آشیریلیشینی انیقلمه گن.
ایلگری، طالبان حکومتی یۉل لرنینگ عایدات و کیره حقینی عنعنوی شکلده و کاغذی فورم لر آرقلی حیداوچیلردن ییغیب آله یاتگن اېدی. بو اوسول هر دایم اداری فساد و بو پول لرنینگ بیر قسمی نینگ یۉق بولیب کېتیشی خصوصیده گی تشویش لرنی اۉزی بیلن کېلتیرر اېدی.
متخصص لرنینگ ایشانچیگه کۉره، تۉلاو سیستمی نینگ رقمی بولیب باریشی فساد نینگ آلدینی آلرلیق درجه ده آلیشی و دولت درآمد لری نینگ آشیشیگه یاردم بېریشی ممکن. هر حالده، بو ریجه نینگ موفقیتلی بولیب چیقیشی مملکت بۉیلب بانکی زیربنا لرگه و حیداوچیلرنینگ بانکی خدمت لرگه قنچه لیک قول تاپیشیگه باغلیق دیر.
بو اقدام افغانستانده مالی و اداری سیستم لرنی زمانه ویلشتیریش اوچون طالبان حکومتی نینگ کینگ قمره ولی سعی و حرکت لری نینگ بیر قسمی دیر. طالبان حکومتی بوندن آلدین هم باشقه بیر قطار دولتی خدمت لرنی رقمی قیلیش اوچون حرکت لرنی باشله گن اېدی.
منبع: اطلاعات روز
🌐
