افغانستان نینگ سویسده‌گی سفیری نصیراحمد اندیشه، خلق ارا مهاجرت تشکیلاتی (IOM) ییغینیده افغان مهاجرلرینی مجبورلب چیقاریش و قیتیب کیلگنلرنینگ قیینچیلیکلری حقیده‌گی جدی خواطرلر اورته‌گه قۉییلگنینی ایتدی.
جناب اندیشه جمعه کونی، ۸ عقربده، اۉز ایکس صحیفه‌سیده بو خواطرلر ژنواده اوشبو تشکیلات نینگ دایمی برنامه‌لر و مالی ایشلر قۉمیته‌سی نینگ اوتّیز تۉقیزینچی ییغینیده افغانستان نماینده‌لر هیئتی نینگ بیانیه‌سیده مطرح ایتیلگنینی یازگن. اونینگ سۉزلریگه کۉره، بو ییغینده قۉشنی و منطقه مملکتلری تامانیدن افغان مهاجر و پناهنده‌لری نینگ انسانی حقوقلری و حرمتیگه رعایت قیلیش ضرورتی تأکیدلنگن.
افغانستان نینگ سویسده‌گی سفیری شونینگدېک، افغانستان بو ییل خلق ارا مهاجرت تشکیلاتی نینگ بودجه‌سیده بیرینچی اۉرینده توریبدیر. او، ییغینده افغان مهاجرلر و میزبان جمعیتلرنی قوللب-قوتلش اوچون ییترلی بودجه تأمینلش و اوزاق مدتلی برنامه‌لر تیارلش ضرورتی تأکیدلنگنینی قۉشیمچه قیلدی.
افغانستان هیئتی بیانیه‌سی نینگ بیر قسمیده مملکت ایچیده‌گی قیینچیلیکلرگه هم اشاره قیلینگن. جناب اندیشه، طالبان حکومتی تامانیدن عیاللر و قیزلرنینگ تعلیم و ایشلشیگه قۉییلگن چېکلاولر، اقتصادی اۉسیش، جمعیتنی قیته قوریش و مملکتگه قیتیب کیلگن مهاجرلرنی قیته ادغام قیلیش آلدیده‌گی مهم تۉسیقلردن بیری اوله‌راق تیلگه آلینگنینی ایتدی.
بو بیاناملر شونده‌ی بیر پیتده بیریلماقده کی، قۉشنی مملکتلردن، خصوصاً پاکستان و ایران دن افغان مهاجرلرینی مجبورلب چیقاریش نینگ ینگی تۉلقینی خلق ارا سویه‌ده کینگ کولملی خواطرلرنی کیلتیریب چیقرگن. حقوقنی حمایه قیلوچی تشکیلاتلر کوپ مرته بو مملکتلردن مهاجرلرنی چیقاریش جریانی نی توخته‌تیشنی و پناهنده‌لر بۉییچه خلق ارا مجوریتلریگه عمل قیلیشلرینی سۉره‌گنلر.
ژنواده‌گی افغانستان نماینده‌لیگی، بو ییغینده افغانستان ایچیده‌گی انسانی بحرانگه ییتیشیش و مملکتگه قیته‌دیگن مهاجرلرنی قوللب-قوتلش اوچون خلق ارا همجمعیت نینگ همکارلیگینی سۉره‌دی. اوشبو نماینده‌لیک، بیر پایدار ییچیم و هر تامانلمه حمایت بولمسدن، قیتیب کیلگنلرنینگ کوپراق قطّاشلیک و بی‌قرالیککه دوچ کیلیشینی تأکیدله‌دی. منبع: نصیراحمد اندیشه نینگ ایکس صحیفه‌سی
🌐
