ایران سپاه پاسداران تشکیلاتی هرمز تنگه‌سیده ایکّی نفت تانکري نینگ دېنگیز ماینلریگه اوریلیشی عاقبتیده پارتله‌گنینی اعلان قیلدی. سپاه نینگ دېنگیز کوچلری نینگ عامه علاقه‌لر ریاستی دوشنبه کونی، ۱۱ عقرب، بیر بیانیه ترقه تیب، اوشبو تانکرلر نینگ رخصتسیز بیر یۉلدن حرکت قیله یاتگنینی ایتدی.
سپاه پاسداران نینگ بیاننامه‌سیده، بو تانکرلردن بیری نینگ سوپر تانکر توریگه عاید ایکنی و کوچلی پارتلشدن سۉنگ آلاوله نگنی بیلدیریلگن. سپاه پاسداران بو کیمه‌لر نینگ اۉز نیویگیشن و تانیش سیستم‌لرینی اۉچیریب، امریکا قوشمه ایالتلری اردوسی حمایه‌سی بیلن یشیرین روشده بو یۉلدن اۉتیشنی قصد قیلگنینی، لیکن حادثه اولرگه تۉسقینلیک قیلگنینی ادعا قیلماقده.
بو حادثه، دنیا نینگ نفت تشیش اوچون اینگ مهم سوو یۉلیدن بیریده کېسکینلیکنی آرتیره‌دی. هرمز تنگه‌سی استراتژیک بیر نقطه بۉلیب، او ییرده‌گی هر قنده‌ی بیر تۉختلیش دنیا انرژي بازارلریگه کتّه تاثیر قیلیشی ممکن.
شونینگدیک، بریتانیا نینگ دېنگیز تجارتی عملیات‌لر مرکزی (UKMTO) هم فارس خلیجیده باشقه بیر دېنگیز حادثه‌سی حقیده خبر بېرگن. بو تشکیلات ایکس اجتماعی ترماغیده بیر بیانیه بیلن، سعودی عربستان نینگ «رأس الخفجی» منطقه‌سی نینگ شرقیده ۷۲ دېنگیز مایلی مسافه‌ده بیر حادثه یوز بېرگنی حقیده گزارش آلگنینی معلوم قیلدی.
بریتانیا دېنگیز تجارتی عملیات‌لر مرکزی نینگ معلوماتیگه کۉره، بو حادثه‌ده بیر کیمه ایکّی نامعلوم آتیلگن نرسه‌سی بیلن نشانگه آلینگن. هلیگچه هجومچیلرنینگ کیملیگی، بو آتیلگن نرسه‌لرنینگ منبعی و هجومدن کیین کیمه و خدمه‌سی نینگ وضعیتی انیقلنگن ایمس.
بیر کونده یوز بېرگن بو ایکّی واقعه، آلدین هم شونگه اۉخشش حادثه‌لر و تجارتی کیمه‌لرگه هجوملرنینگ شاهدی بۉلگن منطقه ده دېنگیزچیلیک خوفسیزلیگی توغریسیده‌گی خواطرلرنی کۉپه یتیرگن. خلق ارا رسميلر هلی بو حادثه‌لر حقیده فکر بیلدیرمه‌گن.
منبع: ایران سپاه پاسدارانی, UKMTO
🌐
