کابلده‌گی محلی منبعلر نینگ معلوم قیلیشیچه، ۱۳- امنیتی حوزه گه تیگیشلی طالبان نینگ بش نفر اعضاسی، دشت برچی منطقه‌سیده بیر یشاوچی نینگ اویینی بوزگن. بو واقعه اوچ هفته آلدین دشت برچی نینگ «ییگیرمه متره» منطقه‌سیده، اوی ایگه‌سی قیش کیلیشیدن آلدین اویینی ترمیم قیلماقچی بۉلگن پیتده یوز بېرگن.
منطقه نینگ یشاوچیلریدن بیری بۉلگن لعل محمد، بو واقعه نینگ شاهدی بۉلیب ایتگن که، طالبان کوچلری تاش، آغاچ و تېمیر میله‌لردن فایده لنیب بو اویگه هجوم قیلگن و اونینگ بعضی قسم‌لرینی ویران قیلگن. اونینگ سۉزلریگه کۉره، طالبان نینگ هجومی و خلق نینگ قۉرقودن قاچیش صحنه‌سی قۉرقینچلی اېدی و خاتین-قیزلر و باله‌لر حیرتده قالگن اېدیلر.
طالبان نینگ بو ایشی نینگ سببی، اوی ایگه‌سی نینگ اوی تامی نی پلستر قیلیب، بیر آغاچ خانه هم قورگنی اېدی. طالبان کوچلری بو اویگه ایکّی مرته کیلگن. بیرینچی مرته، اوی ایگه‌سی یۉقلیگی اوچون، ایشچیلرنی بیر نیچه ساعت‌گه توتیب آلیب، سۉنگ آزاد قیلگنلر. لیکن اوی ایگه‌سی ترمیم ایشیگه دوام بیرگنده، طالبان کوچلری ایکّینچی مرته کیلیب، بو سفر اوی نی بوزیشگه باشلگنلر.
بو ایش نتیجه‌سیده، بو اوی نینگ ایشیک‌لری، دېره زه‌لری و دیوارلری کوچلی زیان کۉریب، یششگه یراقسیز حالگه کیلگن. اوی ایگه‌سی، که کونده‌لیک ایشچی بۉلیب، قوریلیش ایشینی باشقه‌لرگه تاپشیرگن اېدی، حاضر قۉرقودن نامعلوم بیر جایگه قاچیب، اوییگه قیتیشگه جرأت قیله آلمه‌یدی.
-بو واقعه، بعضی طالبان کوچلری نینگ شهروندلر بیلن اۉزباشیمچه‌لیک روشده رفتار قیلیشی حقیده‌گی خواطرلرنی کۉپه یتیرگن. محلی یشاوچیلرنینگ ایتیشیچه، بونده‌ی ایشلر خلق آره‌سیده قۉرقو و ایشانچسیزلیککه سبب بۉله‌دی.
کابلده‌گی طالبان محلی رسميلری هلیگچه بو توغریده فکر بیلدیرمه‌گن. بو ایسه، آلدین هم مملکت نینگ تورلی منطقه‌لریده طالبان کوچلری نینگ خلق بیلن شونگه اۉخشش رویارولیگی حقیده گزارش‌لر ترقه لگنی بیر حالده یوز بیرماقده.
منبع: عینی شاهدلر
🌐
