پروان ولایتیده‌گی محلی منبع‌لرنینگ ایتشیچه، طالبان استخباراتی تامانیدن سالنگ ولسوالی‌سی نینگ ۱۸ نفر یشاوچیسی قولگه آلینگنیدن بیر آی اۉتگن بولسه‌ده، اولرنینگ عایله‌لری هلی هم تقدیرلریدن بی‌خبرلر. قولگه آلینگن‌لرنینگ یقین لریگه کۉره، طالبان رسمی‌لری بو کیشی‌لرنی قولگه آلگن‌لرینی انکار ایتماقده‌لر.
سالنگ ولسوالی‌سی نینگ «کوکلامی» قشلاغی یشاوچیلری بولمیش بو کیشی‌لر، بیر آیدن کۉپراق آلدین «طالبان مخالف جبهه‌لری بیلن همکارلیک» عیبلوی بیلن قولگه آلینگن ایدیلر. خلق منبع‌لری دوشنبه کونی، ۱۱ عقرب، افغانستان اینترنشنل‌گه ایتدیلر که، عایله‌لر متواتر تعقیب‌لرگه قره‌مسدن، یقین‌لری نینگ سقلنیش جایی یا وضعیتی حقیده هیچ قنده‌ی معلومات قولگه کیریته آلمه‌گنلر.
بو قشلاق یشاوچیلریدن بیری ایتگن که، اونینگ آته‌سی، کاکه‌سی، اوغلی و عایله‌سی نینگ توپلم آلتی اعضاسی قولگه آلینگن‌لر آره‌سیده دیر، لیکن طالبان هیچ قنده‌ی معلومات بیرمه‌یدی. طالبان تامانیدن بو بی‌خبرلیک و انکار، عایله‌لرنینگ تشویشینی ایکّی برابره قیلگن.
قولگه آلینگن‌لردن بعضی‌لری نینگ کیملیگی خدایار، میرالله، دوست محمد، گل سعید، حسام الدین، حمیدخان، خیرالله، انور، سیدرحمان و فضل الرحمان دیب اعلان قیلینگن. ایتیلیشیچه، آلدینگی حکومت نینگ بیر قطار حربی‌لری هم بو کیشی‌لر آره‌سیده بار.
بو عایله‌لر حقوق بشری نهادلر و خلق ارا سازمان‌لردن، یقین‌لری نینگ تقدیرینی آیدینلشتیریش و سقلنیش جایینی انیقلش اوچون تیکشیریش و حرکت قیلیش‌لرینی سوره‌گنلر. اولر طالبان حبسخانه‌لریده عزیز‌لری نینگ امنیتی و ساغلیگیدن خواطرده‌لر.
بو واقعه، اۉزباشیمچه‌لیک بیلن قولگه آلیشلر، قهری یۉق قلیشلر و طالبان نینگ جوابگرلیکدن باش تارتیشی نینگ باشقه بیر نمونه‌سی دیر که، حقوق بشری سازمان‌لر تامانیدن کۉپ مرته گزارش بیریلگن. بو سازمان‌لر مستقل نهادلرنینگ نظارتیدن اوزاقده سقلنه‌یاتگن زندانی‌لرنینگ وضعیتیدن تشویش بیلدیرگنلر.
کۉپلب موردلر موجود که عایله‌لر یقین‌لری یۉقالگنیدن آی‌لر و حتی ییل‌لر سۉنگ، اولرنینگ تقدیرلریدن خبر تاپگنلر و بعضی حالت‌لرده، فقط عزیز‌لری نینگ جسدلری اولرگه تاپشیریلگن. بو وضعیت، خلق آره‌سیده قۉرقوو و ایشانچسیزلیکنی چوقورلشتیریه‌دی.
منبع: افغانستان اینترنشنال
🌐
