افغانستان متحد جبهه سی، اۉز کوچلری دوشنبه کونی، ۱۳ میزانده، هلمند ولایتیده طالبان کنترولی آستیده گی بیر زندانگه هجوم قیلگنینی ادعا قیلدی. طالبانگه قرشی بو جبهه نینگ ایتیشیچه، اوشبو هجومده قول بومبیدن فایده له نیلگن.
بو گروه دوشنبه آخشام اۉزی نینگ ایکس صحیفه سیده ترقتگن بیر بیاناتده، اوشبو هجوم عاقبتیده بیر طالبان جنگچیسی اۉلدیریلیب، باشقه ایکی ته‌سی یره لنگنینی ادعا قیلدی. افغانستان متحد جبهه سی زندان نینگ انیق جاییشووی یاکه طالبان جنگچیلری نینگ کیملیگی حقیده قۉشیمچه تفصیلات بېرمه‌گن.
هلمندده گی طالبان محلی رسميلری حاضرگچه بو ادعا حقیده فکر بیلدیرمه‌گن. مستقل منبعلر هم بو هجوم و اونینگ نتیجه سیده گی تلفاتنی تصدیقلشگه قادر بۉلمه‌گن.
بو ادعا، متحد جبهه سۉنگگی کونلرده جنوبی ولایتلر یعنی هلمند و قندهارده طالبان کوچلریگه قرشی باشقه نېچه هجوم اویوشتیرگنینی ادعا قیلگن بیر پیتده اۉرته گه تشلنماقده. بو گروه، ۱۴۰۰ نچی ییل اسد آییده طالبان نینگ قیته دن قدرتگه اېگه بۉلگنیدن سۉنگ، اولر نینگ حکومتیگه قرشی شکللنگن بیر قنچه قوراللی جبهه لردن بیری دیر.
سۉنگگی آیلرده، افغانستان نینگ تورلی منطقه‌لریده طالبانگه مخالف قوراللی جبهه‌لر نینگ هجوملری کۉپه یگن. ملی مقاومت جبهه سی و افغانستان آزادلیک جبهه سی کبی گروهلر هم منظم روشده طالبان موضع لری و کوچلریگه قرشی هجوملر مسئولیتینی اۉز بوینیگه آلماقده.
بو هجوملر اساساً چریکی شکلده و یۉل چکّه‌سیده گی ماینلر، قول بومبلری و کفلتی هجوملر آرقه لی عملگه آشیریلماقده. گرچند بو گروهلر حاضرگچه هیچ قنده‌ی منطقه نینگ کنترولینی قولگه کیریته آلمه‌گن، لیکن اولر نینگ فعالیتلری طالبان حکومتی اوچون دواملی بیر خوفسیزلیک معماسینی ایجاد قیلماقده. طالبان حکومتی معمولاً بو هجوملرنی اهمیتسیز کۉرسه ته‌دی یاکه اولر حقیده سکوت قیله‌دی.
منبع: افغانستان متحد جبهه سی
🌐
