افغانستان آزاد رسانه‌لرینی حمایه قیلووچی سازمان (امسو)، چېگره سیز گزارشچیلر سازمانی (RSF) تامانیدن طالبان رهبری هیبت‌الله آخندزاده نینگ ۲۰۲۶-ییلده «رسانه‌لر آزادلیگی نینگ آوچیلری» جهانی رویخطیگه کیریتیلیشینی خوش قرشیله‌دی. امسو بو اقدامی افغانستانده رسانه‌لرگه قرشی کینگ کۉلملی چیکلاولر اوچون طالباننی جوابگر قیلیش یۉلیده مهم بیر قدم دیب بیله‌دی.
امسو سه‌شنبه کونی، ۱۲ عقرب ده، بیر بیانیه ترقه تیب اعلان قیلدی که بوتون جهانده رسانه‌لر آزادلیگینی پامال قیلووچی ۳۳ فرد و نهادنی اۉز ایچیگه آلگن بو رویخط، خلق ارا جامعه نینگ دقتینی افغانستانده بیان آزادلیگی نینگ یامان وضعیتیگه جلب قیله‌دی. چېگره سیز گزارشچیلر دوشنبه کونی، رسانه‌لرنی باستریشده‌گی روللری اوچون طالبان رهبری و دونالد ترامپنی بو رویخطگه قۉشگنینی اعلان قیلگن ایدی.
امسو بیانیده ایتیلگن که طالبان حکومتی ینه قدرتگه کیلگندن بویان، ژورنالیستلرنی توتقونگه آلیش و تهدید قیلیش، شدید سانسورنی عملگه آشیریش، اونلب رسانه‌نی یاپیش، معلومات جریانینی کنترول قیلیش و عیال ژورنالیستلرنی عمومی ساحه‌دن تۉلیق چیقاریش بیلن مطبوعات آزادلیگینی جوده چیکله‌گن. بو سازمان تأکیدله‌دی که بو حرکتلر فقط ژورنالیستلرنینگ حرفه‌ای حقوقلرینی پامال قیلمه‌ی، بلکه شهروندلرنینگ آزاد معلومات و آگاهلیککه ایریشیشینی هم یۉق قیله‌دی.
بو سازمان خصوصاً عیال ژورنالیستلرنی ایش محیطیدن چیقاریلیشینی جامعه نینگ یریمی نینگ سسینی اۉچیریش و اولرنی افغانستان نینگ عمومی و اجتماعی حیاتیده قتنه شیشدن محروم قیلیش دیب توصیفله‌گن.
امسو خلق ارا جامعه، رسانه‌لرنی حمایه قیلووچی خلق ارا نهاد‌لر و بشر حقوقلری مدافع سازمانلریدن بو چیکلاولرگه قرشی قاطع بیر موضع آلیشلرینی سوره‌دی. بو سازمان شونینگدیک ژورنالیستلرنینگ اۉزباشیمچهلیک بیلن توتقونگه آلینیشینی توگه تیش و مملکتده رسانه‌لرنینگ آزاد فعالیتی اوچون زمینه یره تیش اوچون طالبانگه باسیم اۉتکزیشنی طلب قیلدی.
نهایتاً، امسو افغان ژورنالیستلرگه قرشی زوروانلیک و تخلفلر موردلرینی مستندلشتیریش ضرورتینی تأکیدله‌دی تا که کېله جکده بو باستریش عامللرینی جوابگر قیلیش اوچون زمینه یره تیلسین. بو سازمان افغانستانده رسانه‌لر آزادلیگی وضعیتی نظارتینی دوام ایتتیریشگه متعهد بۉلدی.
منبع: چېگره سیز گزارشچیلر
🌐
